Tuchel enkawl Chelsea an danglam

Thomas Tuchel-a'n Chelsea a enkawlna match hmasa berah danglamna a thlen a, inkhel hmuhnawm an chhawp chhuak. Mahse, Blues hi an mikhual Wolverhampton Wanderers nen goal awm loa an inhnehtawk avangin an lawm erawh a la famkim thei rih lo.

Frank Lampard an ban hnuah Thawhlehni khan Chelsea hian Tuchel an lalut fel, German manager hian a team thar hi vawi khat chauh training neihpui hman mah se; Nilaini zan khan Premier League-ah a kaihruai nghal a, ball pass hnem record (820) an siam nghal.

Blues hian Pathianni zanah Burnley an mikhual zui dawn, point thum hmuh ngei an tum tawh ang. Nuno Espirito Santo enkawl Wolves erawhin Inrinni zanah Crystal Palace an lenchilh leh thung dawn a ni.

Kum 2019 August thla khan Lampard chuan Chelsea a enkawlna match hmasa berah Leicester City a hmachhawn. Stamford Bridge-ah fans tam tak in 'Welcome Home Super Frank' tih banner nen inkhel an en a, an mikhual Foxes nen hian 1-1 in an inhnehtawk.

Tuchel-a match hmasa berah pawh Lampard lawmna banner hi a la intar reng a, a hmuna entu fans an awm loh bakah player thlan dan pawh a danglam ta. Lampard kaihhruaina hnuaia Premier League match 39 bulṭan Mason Mount, Reece James leh Tammy Abraham te chu bench-ah dah an ni.

Tlarhma lamah Timo Werner pawhin bul a ṭan lo a, midfielder Kai Havertz leh Olivier Giroud ten bul an ṭan. N'Golo Kante chu hliam vangin a la inlan thei lo; English manager hnuaia khelhna chang lo Jorginho chu ball sem turin a lo kir leh tawh bawk.

Ball pass thiam Jorginho thlawp turin Mateo Kovacic a awm a, anni pahnih hian midfield aṭangin ball an sem kual. Blues hian vawi 820 zet ball an inpe kual - Premier League season kal laiah match khata ball inpe kual hnem ber an ni hial.

Tuchel-a nauten ball chang hnem mah se a hmawr erawh an bawk fuh hleithei lo. Defender Antonio Rudiger-a tauh ṭha tak chu Wolves keeper Rui Patricio-a'n a lo dansak a, forward Callum Hudson-Odoi pawhin a hun ṭha neih a chhawr ṭangkai thei bik lo.

Blues tan hian Ben Chilwell chu hun nei ṭha bera ngaih ni mah se goal bar chungah a pet chhuak. Wolves lamin Pedro Neto hmanga bar an tih per bakah striker thar Willian Jose chuan mualneitu lam tlarhnung a chhaih buai ve zauh zauh bawk.

Paris Saint-Germain manager hlui Tuchel tan Chelsea player zawng zawng hriat belna hun a la awm lo, inkhel bul ṭan tur thlanchhuah ringawt pawh a awlsam lo ang tih a chiang. Captain Cesar Azpilicueta hming pawh a bel hman lo.

Chawlhlawk laiin Tuchel hian Azpilicueta hi thu hrilh a duh a, 'Azpli, Azpli' tiin a ko. Spanish defender hian an coach kohna hi a hria a, thu inhrilh tur ang chu an inhrilh thei tho. Mahse, Christian Pulisic chuan an coach hnenah an captain chu 'Azpli ni loin, Azpi' tia an koh ṭhin thu a hrilh.

Borussia Dortmund pawh enkawl tawh manager hian boruak danglam tak a keng tel tih chu a chiang nghal. English manager Lampard-a'n a la neih ve loh 'tawnhriat' a ngah tawh a, sum tam tak senga lei khawm player ṭhaten an theihna tak an pho chhuak a nih pawhin a mak lo ang.

Chelsea manager Tuchel chuan, "Kan khelh dan phungah kha chuan ka lawm hle, chakna goal kan khung lo erawh a uiawm takzet. Ball chang hnem leh inkhel thunun chunga kan khel zel thei a nih chuan result ṭha chu a rawn kal mai ang.

"Ni thum dan lek lekah match khelh tur a awm chho dawn a, hun tlemte kan neih chhungin nasa taka hmasawn kan tum dawn. Team dangin an hmachhawn chak loh leh an tum hreh tak club nih kan tum dawn a ni," tiin team ṭha tak din a tum thu a sawi.

Wolves boss Nuno Espirito Santo chuan, "Thil tum nei sain khualmualah kan feh chhuak a, chumiah chuan kan chiang. Point hlu tak kan hlawh chhuak," tiin Stamford Bridge aṭanga point khat hmuh chu a lawm thu a sawi.

Chelsea: (3-4-2-1): Mendy; Azpilicueta, Silva, Rudiger; Hudson-Odoi, Jorginho, Kovacic, Chilwell (Pulisic 76); Ziyech (Mount 82), Havertz; Giroud (Abraham 77).

Sub: Arrizabalaga (GK); Alonso, Werner, Zouma, James, Emerson Palmieri.

Wolves: (3-4-1-2): Patricio; Boly, Coady, Kilman; Semedo, Dendoncker, Neves, Ait-Nouri (Hoever 46); Podence (Jose 72); Traore (Moutinho 90), Neto.

Sub: Ruddy (GK); Silva, Vitinha, Cutrone, Saiss, Otasowie.