Match hnih atan Conte an hrem

Inter Milan coach Antonio Conte chu match hnih chhung a naute enkawl thei lo tura hrem a ni. Italian manager hian Udinese nen an inkhelh ṭumin referee Fabio Maresca chu ṭawngkam mawi lo takin a an khum a, hun tawp dawnah hnawhchhuah a ni hial.

Conte hi match hnih atan an hrem bakah pawisa chawitir a ni bawk. Hrem a nih vang hian Benevento leh Fiorentina an hmachhawn hunah a naute a enkawl thei dawn lo tihna a ni ang.

Inter coach Conte bakah hian team manager Gabriele Oriali pawh a khawsak dan mawi lo vangin match khat atan an hrem ve bawk. Oriali hian inkhelh banah Maresca chu kal chilhin a an khum ve a ni.

Serie A season kal laiah Inter hi pahnihna an ni mek a, an chungah hian an hmelma leh elpui ni bawk AC Milan an awm - team pahnih inthlauhna hi point hnih chauh a nih avangin nomawi inchuh boruak a sang chho hle.