Asian Cup 2019: Zaninah India hma 'hun' a chiang dawn

India-in Asian Cup 2019 last 16 an khelh dawn leh dawn loh zaninah a chiang dawn - dar 9:30 hian Bahrain nen an inkhel dawn a, hnehna an chang a nih chuan result danga innghat loin knockout stage an lut chiang ang. 

Zanin dar 9:30-ah vek hian United Arab Emirates leh Thailand an inkhel dawn bawk a, India 'result' a zirin Blue Tigers tan team pahnih inkhel result hian awmzia a nei ang. 

India captain Sunil Chhetri chuan, "Beiseina sang tak kan la neih avangin Bahrain hmachhawn tur hian kan inpeih a ni. Theihtawp chhuaha bei turin kan inpuahchah a, chu chu kan game 'plan' a ni," tiin hnehna chan a tum hle.

Blue Tigers coach Stephen Constantine chuan, "Qualify ngei turin result duhawm kan neih ka beisei," tiin inkhel a thlirlawk a, India mipui tluklehdingawn chuangin chu hun chu nghakhlel takin an thlir. 

Blue Tigers hian match hnih an khelh tawhah point thum chiah la nei mah se beisei aia ṭhaa an khelh miau avangin team boruak a ṭha a, Bahrain lakah pawh inrintawkna nen an inkhel ang tih a chiang. 

India hian an match hmasa berah rin loh takin Thailand chu 4-1 in an sawp a, he inkhelah hian Mizo tlangval Jeje Lalpekhlua chuan goal khat a khung. Match hnihnaah phur takin UAE an hmachhawn a, 2-0 in an tlawm thung. 

Hetihrual hian UAE lakah pawh India an khel ṭha takzet a, inkhel thlirtute chuan Blue Tigers hian chak an phu zawk tih an pawm vek ang - Thailand leh UAE laka an khelh dan en chuan India tan chak beiseina a awm a, 'vanneihna' erawh an mamawh ang. 

India coach Stephen Constantine-a'n engtinnge player a rem dawn a la hriat loh a,match hmasa pahnihah chuan tlarhmaah player tlan chak a mamawh thu sawiin Chhetri thlawp turin 100% fit lo Jeje aiah Ashique Kuruniyan luhtir a ni. 

Mahse, English coach hian match hmasa pahnihah Jeje hi bench aṭangin a luhtir ve ve tho a, Thailand lakah goal a khung laiin UAE lakah erawh uiawm takin a hun ṭha a hlah a, goal nawr kawngah India tan a ṭangkai hle. 

Inkhel hmasa pahnih thlirin Constantine hian Jeje hi inkhel bul ṭantir lo pawh ni se bench aṭangin a luhtir a rinawm tho a, an chak mamawh dan ngaihtuahin Sunil Chhetri nen a inkawp tir nghal a nih pawhin a mak lo ang. 

India leh Bahrain-in friendly match an la khelh dun miah loh avangin an la intawng tam lo a, vawi nga chiah an la inhmachhawn - Bahrain hian vawi li hnehna changin vawi khat an inhnehtawk. 

Team pahnih intawn hnuhnung ber chu Asian Cup 2011 kha a ni a, hemi ṭum hian 5-2 in India hi an sawp - Blue Tigers tana he inkhela goal khungtu Sunil Chhetri chu India team-ah a la awm reng avangin Bahrain tan fimkhur a fin thlak ang. 

Bahrain hian match hnuhnung zawkah India sawp hnu Thailand ngam lo ngawt mah se lo zuam ve ngawt chi an ni lo - UAE leh Thailand laka an result hi an vanduai tia sawi theih a ni a, India lakah vanduai nawn an duh dawn lo. 

Kum 28 mi forward Mohamed Al Romaihi chu Bahrain tan player ṭangkai a ni leh dawn - UAE laka goal khungtu hi UAE defender chhaih mangangtu a ni a, Thailand lakah hun ṭha vawi tam a nei chungin a vanduai takzet thung. 

Bahrain-in set piece pet thiam hmingṭhatpuitu Ali Madan an neih avangin India tan penalty area hnaiha freekick chawi loh chu thil finthlak a ni dawn a, kum 23 mi midfielder hi midfield aṭangin Bahrain inkhel kaihruaitu ber a ni ang. 

•    India hian Bahrain an hneh a nih chuan an tlang dawn chiang a, UAE leh Thailand result-in a tibuai lo ang. 

•    India hian Bahrain an inhnehtawkpui a nih pawhin last 16 an lut chiang ang. 

•    India leh Bahrain hi inhnehtawk se, UAE hian Thailand inhnehtawkpui bawk se UAE hi hmahruaitu nichungin an tlang ang a, India hi Thailand an hneh tawh avangin head-to-head hmangin an tlang ang. 

•    India leh Bahrain hi inhnehtawk se, Thailand hian UAE hneh ta se UAE chu group pahnihna tur an ni. Mahse, India hian point li an neih dawn tho avangin pathumna zinga a ti ṭha pali zingah telin last 16 an lut ang. 

•    Bahrain hian India an hneh a nih chuan Blue Tigers tan group dang result a zirin pathumna zinga a ti 

ṭha pali zinga tela last 16 luh chu beiseina tur a ni. 

•    Bahrain hian India an hneh a, Thailand hian UAE an inhnehtawkpui emaw an hneh a nih chuan India hi group stage-ah an tla ang. 

•    Bahrain hian India hneh pawh ni se UAE-in Thailand an hneh chuan India tan beiseina a la awm tho ang.