Mizoram tan Vanrammawii'n bronze medal a la

Maharashtra-a Khelo India Youth Games neih mekah R. Vanrammawii chuan kum 21 hnuai lam inelna, judo 52kg huangah bronze medal a la. Judo bikah hian Zonunsangi chuan bronze medal a lo hlawh chhuak tawh bawk.

Nikum Junior National Championship-ah khan Zemabawk North nula Vanrammawii hian Mizoram tan silver medal a la tawh a, hei vang hian Khelo India khel tura tlingin; tunah hian Centre of Excellence, Patiala, Punjab-ah a training mek.

SYS judo coach Lalrengpuia chuan, "Kan beisei leh duhthusam ang chu thleng zo lo mah ila kan thlen chinah hian kan lawm, nikum aia hmasawnna kan nei hi rahbi thar duhawm a ni," tiin Vanglaini a hrilh. Nikum Khelo India-ah khan Mizoram hian judo huangah medal pakhat an la a ni.

Mizoram hian tun dinhmunah medal pariat a la tawh a, gold medal pathum, silver medal pahnih leh bronze medal pathum a ni. Judo-in bronze pahnih an la a, a bak zawng hi weightlifting aṭanga lak a ni. Nikum khan Mizoram hian gold, silver leh bronze medal pakhat ṭheuh a la, kuminah hian medal lak tam kawngah nasa takin hma a sawn.