Vawiinah Chhinga Veng fiahna

Chhinga Veng FC chuan vawiin tlai dar 2:00 hian Barasat Stadium-ah I League second division match hmasa ber an khel dawn a, Kolkata club New Barrackpore Rainbow AC an hmachhawn ang.

New Barrackpore hi Aizawl FC pawh lo enkawl tawhtu Jahar Das-a enkawl a ni a, Mizo club tan pawha khel tawh defender Emma Chigozie leh forward Joel Sunday te an khel bawk.

Chhingcows coach Lalsangzuala Hmar chuan, "Kan khingpuite hi eng ang chiaha ṭha nge kan hre lo a, result ṭha tak hlawh chhuak erawh kan tum. Kan foreigner pahnih Ghanaian defender Godwin Quashiga leh Ukrainain forward Ronaque Bakshi te pawh match hmasa ber aṭanga hman theih an ni a, amaherawhchu kan khelh dan hmang an la bel loh avangin bul an la ṭan lo ang," tiin Vanglaini a hrilh.

Chhinga Veng hian January 17-ah Jamshedpur Reserves an tlawh leh nghal a, Aizawla an match hmasa ber chu January 25-ah an khel dawn a, RG Stadium-ah Kokata club ṭha Mohammedan Sporting Club an mikhual ang.