West Ham lakah Arsenal an tlawm

14th January, 2019

Inrinni zan Premier League inkhelah Arsenal chu West Ham khelmualah 1-0 in an tlawm a, goal awmchhun hi minute 48-naa rawlthar Declan Rice khung a ni.

Unai Emery nau ten match 22 aṭangin point 41 hmuin pangana an ni a, season thara Champions League khel phak tur chin palina Chelsea an phak lohna chu point ruk a nih tawh avangin UCL khelh beiseina a sang ta lo - Hammers erawh pakuana dinhmunah an inhlangkai thung.

Goal khat chu

Manuel Pellegrini-a nauten an khelmual thar London Stadium bika Premier League match 50-na an khel a, Arsenal midfielder hlui Samir Nasri ball fing tak dawngtu kum 19 mi Rice-a'n a hun ṭha neih a hlah lo.

France international hlui Nasri-a'n Hammers tana match hmasa ber a khelh zanah a hmuhnawm nghal a, Rice-a goal khung tur a siamsak hma hian Felipe Anderson tan ball duhthusam a siamsak bawk - Anderson hian goal ban hrulah a pet chhuak hlauh.

West Ham manager Pellegrini chuan, "Rice hi a kum la naupang mah se a theihna a sang tawh hle, leia ball inpek a thiam bakah a kang pawh a la thei hle. Inelna liana a goal hmasa ber a khung hi ka lawmpui," tiin a sawi.

UCL a hla?

Arsenal lamin Pierre-Emerick Aubameyang leh Laurent Koscielny te hmangin goal khung mah se, a siamsaktu Sead Kolasinac chu a offside ve ve avangin pawm a ni lo. Striker Alexandre Lacazette-a'n a hun ṭha neih a hlah bakah keeper Lukasz Fabianski a paltlang zo lo.

Season tawp ruala chhuak tur Aaron Ramsey chu bench-ah dah a ni a, Welsh international hi khelmuala dah luh a nih hnuah boruak siam danglam deuh mah se goal a pai tel lo. Gunners player zinga hlawh hnem ber Mesut Ozil pawh in training zawm tawh mah se squad-ah telh a ni lo, Hammers lakah hian an khingpuite goal bula ball hlauhawm pet chhuak thei an nei lo niin a lang.

Gunners captain Koscielny chuan, "Point khat chauh pawh a hlut tawh laiin point kan hmu lo a, a pawi takzet. Match lehpekah chuan Chelsea nen a ni dawn a, point thum hmuh ngei a pawimawh dawn a ni," a ti. Nizan khan Manchester United-in point thum an hmu a nih chuan Gunners hi an nihrual phak tawh dawn.