Iran tan last 16 a chiang

Asian Cup 2019 round of 16-ah Iran an lut chiang a, Real Madrid boss hlui Carlos Queiroz enkawlna hnuaia khel team hian Inrinni zan khan Vietnam chu khualmualah 2-0 in an hneh. 

Iran hian an match hmasa berah Yemen chu 5-0 a an lo sawp tawh bawk avangin Nilaini zana Iraq nen an inhma­chhawn hunah chak lo pawh ni se a thiam 16 zingah an tel chiang tawh tho ang. 

Asian champion vawi thum ni tawh Iran tan Sardar Azmoun chuan goal hnih a khung a, match hnih a khelh aṭangin goal thum a khungna a ni ta - Rubin Kazan striker hi World Cup zawha sawisel a tawh nasat avanga ram tana inkhelh chawlhsan tu kha a ni a, October 2018 khan ram tana inkhel turin a lo kir leh a ni.

England coach hlui Sven-Goran Eriksson enkawlna hnuaiah Phili­ppines-in Asian Cup-ah beisei nei sang viau mah se a zawna a vawi hnih nan an tlawm a, China lakah 3-0 a tlawmin last 16 an khel dawn lo. 

China tan Wu Lei chuan goal hnih khungin Yu Dabao chuan goal khat a thawh ve bawk a, Marcello Lippi enkawlna hnuaia khel team hian last 16 an lut chiang thung.

Team langsar dang zingah South Korea chuan Kyrgyzstan chu 1-0 a hnehin last 16-ah hmun an sawh nghet ve bawk a, Kim Min-jae chuan he inkhela goal awmchhun hi a khung.