A chung berah Liverpool an leng zel

Liverpool chuan Inrinni zan khan Brighton & Hove Albion chu Mohamed Salah-a penalty hmangin 1-0 in an hneh a, Premier League table chung berah an awm chhunzawm zel.

Brighton khelmuala Liverpool khelh danah Reds ṭantute tan mit 'tlunna' tur a awm lo a, mahse khelh ṭhat loh ni pawha point thum hlawhchhuah hi champion 'zia' tia an sawi ṭhin kha a ni. 

Liverpool hian hnehna an chan avangin anmahni hnaih bertu Manchester City aiin point sarihin an sang tawh zawk - Pep Guardiola naute hian match khatin an khel tlem thung. 

Manchester City hian zanin dar 1:30-ah Wolverhampton Wanderers an mikhual dawn a, hnehna chang pawh ni se Liverpool hi point liin an la thlau tho ang. 

Liverpool-in Krismas boruak duhawm tak an hman hnuah kum tharah erawh 'Happy New Year' kan tiha a 'Happy' lai hi an la hmang ve lo a, league-ah Manchester City an ngam loh hnuin FA Cup third round aṭangin Wolves-in an hnawt chhuak leh bawk. 

Inrinni zanah erawh hnehna an chan ve leh tak avangin Liverpool fan-ten kum 2019-ah nui hmel an pu ve leh ta a, Premier League nomawi an mitthla ṭan tawh a nih pawhin a mak lo ang.

Liverpool hian 70% zet ball an chang chungin Brighton tlarhnung an ṭhiat hleithei lo a, a bik takin first half an inkhel chu a hmuhnawm lo hle - minute 50-naa Salah penalty hlawhchhuah erawh sawisel bo a ni. 

Chawlhlawk hman hma hmuh tur a awm mang loh hnuah Salah hi Pascal Gross chuan penalty area-ah a shot nei tur chu a pawt thlu a, referee-in penalty a pe - Salah hian tun season Premier League-a a goal 14-na ni turin a khung.  

Liverpool-in penalty hmanga goal an khung hnuah an ziaawm hret a, chance pawh an neih chhunzawm. Georginio Wijnaldum chuan uiawm takin a shot goal lo a, James Milner-a siamsak chu Salah chuan hnai set sawt aṭangin a pet goal lo bawk. 

Reds hian tlarhnung laiah Dejan Lovren chu hliam vangin an chhawr thei lo a, Virgil van Dijk chu Fabinho nen inkawp tir an ni a, right back-ah Trent Alexander-Arnold chu warm up na lamah inhliam deuh mah se a inkhel tluan thei bawk. 

Liverpool boss Jurgen Klopp chuan, "Kan game puitlin ber ṭum a ni hial mai thei a, naupang chhia taka inkhel kha a awm lo a ni," tiin beisei an pha lo chunga an chak chu a lawm thu a sawi.

Klopp chuan sawizawmin, "Kha aia khel ṭha thei zawk kan ni a, mahse hnehna kan chan miau avangin ka lawm a ni. Hnehna chang turin kan kal a, kan hna kan hlen a ni," a ti.

Premier League champion beisei ngam tawh lo mah se Chelsea chuan 2-1 in Newcastle United an hneh a, season tawpa a sang pali zinga tel turin an dinhmun an sawhnghet zel. 

Chelsea tan Pedro chuan minute kuana lekah goal hmahruai a khung a, Magpies tan Ciaran Clark chuan minute 40-naah si phurh sut mah se tun hnaia Barcelona nena sawizawm hlawh mek Willian chuan second half-ah Blues chakna goal a khung. 

Blues manager Maurizio Sarri chuan inkhelh zawhah Willian chu an tan player pawimawh tak a nih thu sawi nghalin, "Kan tan chuan Willian hi player pawimawh tak a ni a, winger kan mamawh a ni. Pedro kan mamawh a, Callum Hudson Odoi pawh kan mamawh," tiin Bayern Munich nena sawizawm Odoi chhuah loh tur thu a sawi tel nghal. 

Willian pawhin a pu thusawi hi zawmin,"Ka hma hun chu Chelsea-ah hian a awm a, in thil sawi awmzia hi ka hre lo a ni," tiin chhuah a tum hmel loh hle.