Football-ah Mizoram che ṭha

Khelo India Youth Games neih mekah Inrinni khan Mizoram Under 21 boys leh Under 17 boys ten hnena an chang a, Under 21 Girls te an inhnehtawk thung. Vawiin hian Mizoram aṭanga kal football team thum hi an inlan leh vek ang a, semifinal an luh leh luh loh a chiang ang.

Pune-a inelna neihah hian Under 21 Boys chuan Chandigarh 4-1 in an hneh a, an match hmasa bera Maharashtra an hneh tawh bawk avangin semifinal an lut. Coach Chawngthansanga enkawl team tan hian Lalnunzama chuan goal hnih a khung a, Vanlalnghenga leh David Laltlansanga ten goal khat ve ve an khung bawk. Vawiin hian group match hnuhnung berah Kerala an hmachhawn ang a, an chak lo a nih pawhin group hmahruaitu an ni tho ang.

Under 21 Girls-in an match hmasa bera Himachal Pradesh 13-0 zeta an hneh hnuah Inrinni khan Odisha nen 1-1 in an inhnehtawk a, Mizoram goal awmchhun hi Kolasib tleirawl Lalnunsangi khung a ni. Semifinal an luh leh luh loh hi match hnuhnung bera Tamil Nadu nen an inkhel result a zir a ni ang. Tamil Nadu hi India ram junior-a inelna hnuhnung pahniha champion an ni a, Mizoram hi an chak lo a, Odisha-in goal ṭhahnem tak an khung chuan coach Vanlalpeka hote hi tla thei an ni.

Under 17 Boys in match hmasa bera Karnataka 4-1 a an hneh loh hnuah insiamthain Inrinni khan Uttarakhand 4-1 in an hneh a; Hmingchungnunga chuan goal hnih khungin Laldanmawia leh Isaak Malsawmkima ten goal khat ve ve an khung bawk. Vawiin hian group match hnuhnung bera Punjab nen an inkhel dawn a, hnehna an chang a nih pawhin vanduai chuan tla thei an ni. 

Mizoram hmeichhe hockey Under 17 team chuan Inrinni khan Haryana nen 2-2 in an inhnehtawk a, Under 21 hmeichhe team erawhin Jharkhand 5-2 in an hneh lo thung.

Wrestling lamah Mizoram an vanduai a, Elizabeth Rohlupuii (U65 kg) leh Vanlalhriati (U49 kg) te chuan semifinal lut mah se an khingpui an hneh lo a, bronze medal inchuhnaah a vanduai zawkah an ṭang leh ve ve bawk.