Fabregas-a'n Monaco a pan

Cesc Fabregas chuan Arsenal tana a khelh pui tawh Thierry Henry enkawlna hnuaia khel turin AS Monaco chu kum thum leh a chanve chhung atan a zawm a, an inremna zat hi pound maktaduai 10 nia tarlan niin, a khelh ṭhat dana zirin Chelsea chuan a man hi an dawn belh thei dawn.

Kum 31 mi Fabregas hian January 5 zana Nottingham Forest nen FA Cup an khelh ṭumin Blues captain armband a hreng a, hun tawp dawnah thlak niin khelmual a chhuahsan pahin English football a mangṭhana chu chetzia hmangin a lantir a, a mittui a dang zo lo.

Spain international Fabre-gas chuan club thar a neih chu chona thar leh chawimawina a nih thu a sawi a, "Inkhel bul ṭantu zingah tel phak ka tum dawn a, club tih hmasawn nan theihtawp ka chhuah ang, ka hmabak hlen hlan ka nghakhlel tawh hle.

"Mangṭha tih sawi a ngai ta mai hi hrehawm ka ti a, zinkawng ngaihnawm leh hlimawm tak ka tawn avang khan ka lawm. Blues hi an hma huna hlawhtlinna chang zel turin duhsakna ka hlan," a ti.

Barcelona academy aṭangin Arsene Wenger-a'n a la chhuak a, Gunners tan hian inlan thei naupang ber (kum 16 leh ni 177) leh goal khung thei naupang ber (kum 16 leh ni 212 ) a ni. North London club hi FA Cup a chawi pui hnuah a chhawr chhuahna Barcelona-ah a kir.

Catalan club tan season thum chhungin nomawi lian tham paruk a chawi hnuah 2014 khan Chelsea-ah a kir a, Jose Mourinho leh Antonio Conte kaihhruaina hnuaiah Premier League nomawi pahnih a chawi.

A hun pumin Premier League-ah hun hmang lo mah se match 350 a khelh zinga vawi 295 chu bul ṭantu zingah a tel a, thiante goal khung tur vawi 111 ngawt siamsakin a chungah hian Ryan Giggs (162) chiah a awm; Spanish player zingah EPL-a goal khung hnem (50 goals) pathumna a ni bawk.