Murray hian thutlukna dik a siam - Rafael Nadal

Rafael Nadal chuan tun hnaia Andy Murray thusawi chu a ṭawmpui a, atan thutlukna siam hun dik niin a hriat thu a sawi. Player ṭha pahnih hi vawiin aṭanga khelh ṭan tur Australian Open-ah an inlan ang.

World number 1 hlui Murray hian na nei reng chunga tennis khelh chhunzawm chu atan a harsat tur thu a sawi a, vawi hnih a champion tawhna July thla a khelh tur Wimbledon-ah inlan ngei duh mah se atan Australian Open hi inelna lian hnuhnung ber a nih theih hial tur thu a sawi tel bawk.

Kum 32 mi Nadal chuan, "Court chhungah natna nei chunga kan lut a nih chuan chetṭhat theih a ni lo. Hliam ṭhenkhat hi a dam mai thei lo a, tuna Andy tawrh pawh hi a pawi ka tiin ka tawrhpui takzet. Chutih rualin atana ṭha tura a ngaihtuah danah erawh ka hriatthiam pui.

"A chawl a nih chuan tennis tan channa nasa tak a tling ang. Hun rei lote angin lang mah se, kum 10 liam ta khan Andy hi kum 31 mi niin a chawl ang tiin sawi ta ila a rei hmel viau thung si ang, hun rei tak chhung chu ropui takin a inkhel tawh a ni," tiin a sawi.

Grand Slam vawi 17 champion tawh Nadal hi tun Australian Open-ah hian seeded pahnihna a ni a, vawiin chawhma lam hian a match hmasa ber atan James Duckworth a hmachhawn ang. Mipa singles match hmasa ber chu zing dar 5:30-ah khelh tur niin, a hnu lam erawh match rei dana zirin sawi lawk theih a ni lo.

Champion lai Roger Federer pawh vawiinah a inlan nghal dawn. Swiss star hian zantir lamah Denis Istomin a hmachhawn dawn. Istomin hian kum hnih liam ta khan Novak Djokovic chu Australian Open aṭangin a vaw tla tawh a, player langsar ni lo mah se Federer tan fimkhur a ngai ang.