United harhtharnain vanneihna a chhawm

Manchester United-in Ole Gunnar Solskjaer hnuaiah match rukah vawi ruk an chak.

Pathianni zan khan Premier League champion beisei thei zinga mi Tottenham Hotspur an hneh leh tak avangin 'harhtharna tak tak' an chang mek tih a chiang a, chutih rualin an chungah 'vanneihnain' thla a zar tih erawh hmuh hmaih theih a ni lo.

Wembley Stadium-a inkhelah hian Paul Pobga ball pek ṭha bik chu Marcus Rashford-a'n um lutin English forward hian minute 44-naah inkhela goal awm chhun a khung.

United hi league match hnuhnung panga an chak vek avangin point 41 an hmu ta a, Solskjaer-a'n a club hlui a enkawl ṭan tirh hian point 26 hmuin Arsenal chu point riatin an pha lo a, tunah chuan Gunners nen hian an point hmuh zat a inang chiah.

Man United hian Jose Mourinho kaihhruaina hnuaiah Spurs hi Old Trafford-ah 3-0 in an hneh lo a, he mi ṭum hian goal venhim chu hna berah nei mah se goal thum an chhuah ta tho.

Solskjaer thlir dan a dang thung a, United ṭantute hmuh châk 'attacking game' khelh tumin Wembley Stadium-ah an lenglut a, tum mumal tak an nei bawk. 

Tottenham wing back pahnih Kieran Trippier leh Ben Davies te chu goal nawr tura an tlan chhuah tam avangin helai hmun ruak aṭanga nawr tur hian Marcus Rashford leh Anthony Martial te chu an inpeih at reng a, chutihrualin goal venhim a ṭul avangin Luke Shaw leh Ashley Young te chu goal nawr kawngah insumtir an ni thung.

Manager thar hnuaiah United an zalen a, Wembley Stadium-ah Spurs an el tawk a, first half-ah mualneitu lamin goal zawnah an pet loh avangin United an chungnung.

 French midfielder Paul Pogba chuan a duh thala thlah zalen a nih chu nuam a ti ber a, United midfielder hian Rashford-a goal khung tura a ball vawrh chuan a class zia a pholang a, Rashford pawhin Hugo Lloris-a khar kim loh hmu fuh chatin chakna goal a khung.

United tan Jesse Lingard, Martial leh Paul Pogba te pawhin goal khung theihna hun ṭha an hlah a, second half-a Pogba khung tur Lloris-a'n a dang hman chu keeper tam tak chhuah tur a ni.

First half-ah Harry Kane goal khung pawm a ni lo a, Harry Winks-a'n vengtu nei lo Moussa Sissoko hmu fuh loin goal ngei tura ngaih goal-ah an chantir thei lo a. Tottenham vanduaina belhchhah turin Pogba vengtu tharum ngah Sissoko chu inhliam vangin lakchhuah a ni.

Second half-ah Spurs an vanduai chhunzawm a, United keeper David De Gea-a'n an goal khung tur vawi 11 zet a dang.

Thlirna dangah chuan United defender-te an thawkrim tih a hmuh theih a, amaherawhchu Spurs attacking nâl ṭha tak dan an harsat a, point thum hlawh chhuak turin David De Gea thiamna leh vanneihna an mamawh - Spurs finishing a ṭha tawk lo bawk.

Tottenham manager Mauricio Pochettino chuan, "Tottenham khan chak tumin kan theihna zawng zawng kan chhuah a, inkhel kan thunun a, goal chance kan insiam a, kan khelh danah ka lungawi a ni. A chang chuan hnehna chang chungin kan khelh danah lawm loh ṭum te kan nei a, chutiang chu Old Trafford-a 3-0 kan chak ṭumte kha a ni a. Tun ṭumah erawh David De Gea-a'n man of the match a phu hliah hliah," tiin chak lohna phenah lawmna a awm thu a sawi.

Inkhelh tawp hma hretin Harry Kane a inhliam a, Asian Cup khel turin Son Heung-Min-a'n an ram South Korea team a zawm tawh dawn avangin Spurs-in an player pawimawh pahnih an chan dawn tihna a ni.

Tottenham hian January 20 hian Fulham an tlawh dawn a, League Cup semifinal leg 2 khel turin Stamford Bridge an tlawh leh bawk ang. Spurs hian first leg-ah Chelsea hi 1-0 in an hneh tawh thung.

United manager Solskjaer chuan, "Manchester United hi chu match zawng zawng chak tura beisei kan ni a, kan chak kher lo ang a; mahse tuna player-te rilru put hmang erawh match zawng zawnga chak vek a ni thung. First half-a kan hun ṭha neih kan hlah avangin second half a harsa ta deuh a ni," tiin a sawi a, palina chu ban phaka a la awm thu a sawi bawk.

United hian January 19 hian Brighton an mikhaul ang a, January 26-ah FA Cup-a record nei ṭha ber Arsenal hmachhawn turin Emirates Stadium an tlawh ang.

Manchester United-in Wembley Stadium-ah Totten-ham Hostpur 1-0 in an hneh a, goalkeeper David De Gea chu a 'changtupa' a ni a, Spurs-in Mauricio Pochettino ngaihdana a hnuaia an khelh ṭhat ber zanah Spanish keeper an paltlang thei lo.

United manager Ole Gunnar Solskjaer chuan, "Defender ṭha pali kan rem a, an hnungah awiawhawm loh khawpa ṭha David a la awm bawk. Goal-keeper ṭha neih hi phal a ni," tiin a keeper leh tlarhnung a fak a, amaherawhchu De Gea tana dan tur tam zia thlir chuan United tlarhnung a fakna erawh pawm lo an tam zawk ang.

Solskjaer hian United tan season 11 a khelh chhungin Edwin van der Sar leh Peter Schmeichel te nen an khel ho hman a, Norwegian manager chuan, "He club-ah hian keeper ropui tak tak kan hmu tawh a, club history-a keeper ropui ber ni turin Edwin leh Peter te hi a el pha a ni," tiin inkhelh banah a fak.

Kum 28 mi De Gea hian vawi 11 zet a save a, Premier League bika goal chhuah loa a save tam ber ṭum a ni. Chutihrualin Solsjkaer chuan, "Vawi 11 zet a dan avangin a khel ṭha thlawt a, chutihrualin vawi hnih thum tih loh kha chu De Gea theihna aṭanga thlir chuan atan harsa tur a awm lo," tiin a sawi.

Spanish keeper dan tam tak hi Spurs player-te finishing ṭhat tawk loh vang niin an sawi zui a, amaherawhchu United keeper hlui Ben Foster chuan, "Mi tam takin De Gea dan kha a zawnah a kal thu a sawi a, hei erawh khawngaih takin lo hre ru. Ani hi chuan hriatna danglam zet a nei a, a hun takah a hmun takah a awm, zir theih a ni lo," tiin sawi nep theih a nih loh thu a sawi.

De Gea hian kum 2011 khan Atletico Madrid aṭangin United hi a zawm a, season hnuhnung panga zinga paliah club player of the year award a dawng. Inkhelh banah Spurs boss Pochettino chuan, "Second half-a kan khelh dan kha ka hnuaia Tottenham an la khelh ṭhat ber a ni," tiin a sawi a, goal an khung si loh avangin Argentine manager-in a team a fakna hi David De Gea ṭhat zia sawifiahtu a ni.

47'    Son-a ball pet awlsam takin De Gea-a'n a man.

49'    Delle Alli pass ṭha zet chu Harry Kane-a'n kawh zeta petin De Gea a ke dinglamin a dang.

51'    Trippier-a cross chuan Delle Alli goal-ah tauh mah se De Gea'n goal sirah a nam chhuak.

59'    Eriksen-a cross Harry Kane-a'n nang fuh mah se De Gea-a'n a man chat.

65'    Eriksen chuan yard 30 aṭangin a pet a, De Gea tan harsa tur a awm lo. 

66'    Lamela chuan Pogba a chhuhsak a, Hary Kane pe lehin English forward through ball ṭha zet chu Delle Alli-a'n la lutin De Gea-a'n a ke vei lamin a dang.

70'    Eriksen-a corner near post-ah Alderweireld-a'n nang hmasa ber mah se keeper De Gea-a'n a dang hman tho.

71'    Harry Kane-a freekick pet chu De Gea-a'n dive chungin a man chat.

74'    Eriksen-a ball fing tak chu Delle Alli-a'n a pet na tur insiam mah se keeper De Gea-a'n a dang ṭha hle.

86'    Spurs substitute Llorente chuan Kane tan tauh thlain English forward hian Lindelof a bum hnuah goal-ah pet mah se De Gea-a'n a ke dinglamin a dang hman.

89'    Trippier-a cross chu substitute Llorente-a'n box chhungah ṭha takin la thla mah se, keeper David de Gea zawnah a pet.