MFA Women's League atan team a din theih

Mizoram Football Association Women's League chu February 19, 2019 aṭanga khelh ṭan turin inbuatsaihna a kal mek a, team din duh tan hmun ruak pariat a awm.

MFA Women's League hi team pariat tel theih tura ruahman chhin phawt a ni. MFA Women's League-a team din duh tan team tel turte hriat tur pawimawh inziahna chu January 16, 2019 aṭangin MFA Office, City Park-ah lak chhuah theih a ni ang a, January 31 hmaa thehluh tur a ni. Dilna hi pariat aia tam a lut a nih chuan MFA Women's League Board-in a tel tur team pariat hi a thlang chhuak dawn a ni.

MFA Women's League atan hian team awm sa an la awm lo a, a duh apiangin team a din theih. 

League hi Aizawla khelh tura ruahman a ni a, chutihlaiin Mizoram chhunga sorkar department /  district / khua / veng / mipa football club awm sa / sporting club / MHIP / YMA/ college/ sikul / mimal tu pawhin team an din thei a, MFA Women's League Board inkaihhruaina an zawm a ngai thung ang. 

MFA Women's League Board chuan Mizorama player ṭha 32-te an la chhuak dawn a, hengte hi team pakhatah pali aia tam an awm thei lo ang. Team pariatte hian heng player 32 aṭanga an player pali tur hi a pawhin an pawt dawn a ni.

Mizoramah hmeichhe footballer an la ṭhahnem tawk lo a, team pakhatin player ṭha an lak khawm bik lohna turin player ṭha 32-te hi a rualkhai thei ang ber tura sem an ni ang. Team pariatah hian player thlan chhuah zinga pali zel hi an insem rual dawn a ni.

He League hi Mizoram hmeichhe player-te hmasawnna tura an puala siam a nih avangin state pawn player-te khelh phal a ni lo ang.

February-April, 2019 chhunga khelh tura ruahman a ni a; team awm zawng zawng hi vawi khat ṭheuh an inkhel kual chhuak ang a, a tawpa point hmu sang paliin semi final an khel ang.

Team tinah player 16 aia tlem lo, 20 aia tam lo an awm thei ang a; Mizo hmeichhe footballer an la ṭhathnem tawk loh avangin player ziah luh theih zat hi 20 aia tam lo tura tih a ni.

Inkhel hi 35+10+35 minutes khelh tur a ni a, kar khatah vawi khat emaw vawi hnih emaw khelh ṭhin tur a ni ang.

MFA Women's League-ah hian team tel zawng zawngin lawmman an dawng ṭheuh ang.  Ruahman lawk danin champion-in Rs 50,000 an dawng ang a, pahnihnain Rs 25,000 an dawng ang a; hei bakah hian pariatna thlengin pawisa fai lawmman an dawn theih dan tur ruahman a ni.