Pathianni zanah goal a sur
Asian Cup 2019 Pathianni zan inkhelah goal a sur a, match thum inkhelah goal 11 ngawt a lut. World Cup 2022 thleng tur Qatar chuan 6-0 ngawta North Korea sawpin last 16 an lut chiang a, Uzbekistan-in 4-0 a Turkmenistan an sawp laiin Japan chuan 1-0 in Oman an hneh bawk.
Qatar hian minute kuanaah goal khung ṭanin Almoez Ali chuan he inkhela goal hmasa ber hi khungin a hnuah goal thum dang a khung zui a - Asian Cup 2019-a match khata goal li khung hmasa ber a ni. Ali bakah hian Boualem Khoukhi leh Abdelkarim Hassan te chuan goal khat ve ve an khung bawk.
Belgian club Eupen youth system chhuak Almoez Ali hian an match hmasa bera 2-0 a Lebanon an hneh ṭumin goal khat a khung tawh bawk a, goal nga khung tawhin top scorer a ni mek - Qatar hian match hnihah hnehna an chan tawh avangin last 16 an lut chiang tawh.
Group F inkhelah champ-ion tum zinga mi Japan chuan 1-0 in Oman an hneh a, he inkhela goal awmchhun hi Genki Haraguchi-a'n penalty aṭanga a chhuih luh a ni - Japan hian an group aṭangin 4-0 a Turkmenistan sawptu Uzbekistan nen last 16 an lut.
Uzbekistan tan Eldor Shomurodov chuan goal hnih a khung a, Javokhir Sidikov leh Jaloliddin Mas-haripov ten goal khat ve ve khung bawkin an chak chiang hle - Uzbekistan hian an match hmasa zawkah Oman chu 2-1 in an lo hneh tawh bawk a, January 17-a Japan nena an inkhel tur chu group hmahruaitu nih inchuhna inkhel a ni dawn a, a hmuhnawm dawn.
Zanin Asian Cup-ah Group B an inkhel dawn a, hei hi a hmuhnawm ang - Australia-in match hmasa berah Jordan an hneh loh avangin last 16 an la lut chiang lo a, an hmun tichiang turin zanin dar 7:00-ah Syria an hneh a ṭul ang.
Hetihrual hian Syria hi match hnih khelha point khat nei tawh niin knockout round luh an la beisei ve tho a, champion lai Australia lakah hian awlsam taka tlawm an duh bikin a rinawm lo.
Zanin dar 7:00-ah vek last 16 lut chiang tawh Jordan leh Palestine an inkhel dawn a, Palestine hian point khat an neih sa avangin Jordan an hneh chuan last 16 luhna kawngka zau takin a in hawng dawn a, hnehna chan an tum dawn.