Messi 400 - Barca forward a ropui zual zel

Lionel Messi chuan Pathian­ni zan khan Eibar lakah goal khat a khung a, La Liga-a goal 400 khung thei hmasa ber a ni nghal. 

Barcelona tan Luis Suarez chuan goal hnih a khung ve bawk a, Eibar lakah 3-0 a hnehna changin table chung berah an awm chhunzawm zel. 

Atletico Madrid-in Barce­lona thlah fal lutuk duh loin Levante chu Antoine Griezmann goal khung hmangin 1-0 in an hneh ve bawk a,  Barca nena an inthlauhna chu point nga chiah a ni. 

Real Madrid-in hun tawp nan minute hnih chiah a awm tawh tiha Dani Ceballos goal khung chu chak nan an hmang a, an mikhualna ramah Real Betis chu 2-1 in an hneh ve hram bawk. 

Barcelona tan Messi-a'n mi­nute 53-naah a shot hmasa ber nei ve chauhin a goal nghal a, Argentine forward goal khung hma hian Suarez chuan minute 19-naah goal hmahruai a khung tawh. 

Messi tan La Liga-a goal 400 a khungna chiah a ni a, heti zat goal khung tur hian league match 435 bak a mamawh lo! Europe-a top five league-a goal 400 khung thei pahnihna a ni a, Cristiano Ronaldo chuan England, Spain leh Italy-ah match 507 aṭangin goal 409 a khung tawh. 

Messi-a'n league-a a goal 400-na a khung chiah khan Ronaldo aiin league goal 400 khung turin match 63-in a mamawh tlem zawk tihna a ni nghal a, a record hi a pui hem hem hle.

Argentine forward hian tun season-ah league match 17-ah goal 17 a khung tawh a, La Liga chanchina goal khung hnem ber ni mekin match 292-a goal 311 khungtu Ronaldo leh Athletic Bilbao legend Telmo Zarra (251) ten an dawt. 

Lionel Messi ropuina karah Suarez hming a thamral a, Uruguayan striker hian Messi-a'n Eibar laka an goal hnihna a khung hnuah minute 59-naah he inkhela a goal hnihna a khung. 

Suarez tan league match 18 a khelh tawha a goal 14-na a ni a, Barca-a zawm hnuah league match 148 khelin goal 124 a khung a, inelna hrang hrangah match 221 khelin goal 166 a khung tling der tawh!

Tun season La Liga kal mekah Messi (17 goals) chu top scorer niin Suarez-a'n a la phak lohna hi goal thum a ni - Liverpool striker hlui hnuai chiahah hian Cristhian Stuani (12 goals) a awm.

Atletico Madrid-in an mikhual Levante chu 1-0 in an hneh hram a, he inkhela goal awmchhun khungtu Antoine Griezmann chuan La Liga match nga chhung a zawna goal a khungna a ni ta. 

Madrid khaw club goal neih­chhun hi penalty aṭanga lut a ni a, Nikola Vukcevic handball zar zoin Atletico hian penalty an hmu a, Griezmann chuan harsatna nei loin goal-ah a chantir. 

Atletico-in hnehna chang mah se an khelh danah lawmna tur a tlem a, Diego Simeone-a enkawl team hian champion an tum a nih chuan insiamṭhat an mamawh hle - an league match hnuhnung pathumah goal thum an khung a, goal khat an chhuah. 

Goal thum zinga goal hnih hi an 'home'-a an khung ve ve a ni a, penalty aṭanga an khung ve ve a ni. 

Kumina La Liga match hnih an khelh tawha la chak lo Real Madrid-in Pathianni zan khan an thawnthu an thlak danglam a, an match thumnaah hnehna changin Real Betis chu 2-1 in an hneh.

Real tan Luka Modric chuan minute 13-na lekah goal hma­hruai khungin Madrid khaw club hi awlsam takin an chak dawn niin a lang hman a, goal dang erawh an hlawh chhuak lawk lo. 

ṭha zawk an ni a, Andres Guar­dado chuan a hun ṭha neih a hlah a, Real tan kum 20 mi Federico Valverde chuan a hun a chhawr bik lo - Betis tan Segio Canales chuan minute 67-naah an si phurh a sut ta nge nge a, offside vanga pawm loh ni zet mah se VAR hmanga ennawn niin goal-ah pawm a ni. 

Real-in league-ah a zawnin chak an nei dawn lo nia a lan hnuah Ceballos chuan freekick hmangin minute 88-naah goal ṭha zet a khung a, Betis tan sut letna hun a awm tawh loh avangin 2-1 in Real an chak. 

•    La Liga team 29 chuan an club chanchinah La Liga-a Messi goal khung ang zat hi league-ah an la khung tling lo!

•    Messi-a'n goal 400 khung turin La Liga team 37 lakah a khung a, La Liga-a team hrang hrang laka goal khung hnem ber a ni. 

•    Sevilla chu Messi-a'n goal a khung hnem berna club an ni a, vawi 24 a hmachhawnah vawi 25 a khung.