Bournemouth lakah Everton an vannei

Premier League match hnih chhung a zawna hnehna an chan zawh loh hnuah Everton-in hnehna an chang ve leh ta a, Pathianni zan khan an mikhual Bournemouth chu 2-0 in an hneh. 

Everton tan Kurt Zouma leh Dominic Calvert-Lewin te chuan goal khat ve ve an khung a, Bournemouth-in khel ṭha zawk nichunga goal an khung ve loh avangin an tlawm. 

Inkhel ṭantir lam minute 30 chu Cherries 'ta' a ni a, David Brooks chuan goalkeeper Jordan Pickford chauh a hmachhawn hnuah post a pet per a, Joshua King-a hun duhawm tak chu Pickford hian a dan sak bawk. 

Goodison Park-a inkhelah Everton-in first half chhungin shot an nei miah lo a, an home-a league match hnih chhung chu a zawnin first half-ah shot an nei lo!

Mahse, an khelmuala league match li chhung a zawna chak zo tawh lo Everton hi second half-ah an insiamṭha a, Zouma chuan minute 61-naah Lucas Digne cross chu a tauh lut a, Calvert-Lewin chuan injury time-ah a belh ve bawk. 

Everton tan Richarlison-a khung ngei tur nia lang chu Nathan Ake chuan line aṭangin a pet chhuak hman a, Gylfi Sigurdsson-a ball pek chu a tauh lut teuh viau bawk - Cherries tan Dan Gosling chuan hun remchang nei ve bawk mah se goal-ah a chantir thei lo a, 2-0 in Bournemouth an tlawm. 

Tun hnaia beisei ang result an neih theih loh avanga dinhmun hlauhawm ang hiala sawi Everton boss Marco Silva chuan, "Kan tan chuan point thum pawimawh tak a ni a, kan inkhelh hma khan engkim siam danglam turin hnehna chan kan mamawh tih kan hria a ni," tiin a sawi.