Player langsar an chak

Nimin zing aṭang khan Australian Open chu Melbourne Park-ah khelh ṭan niin, hmeichhe singles player zingah champion thei tura rinkai Angelique Kerber, Sloane Stephens leh Maria Sharapova ten hnehna an chang vek.

World number 2 Kerber hian second round lut turin Polona Hercog chu 6-2, 6-2 in a sawp. German nula hian hnehna chang turin darkar khat leh minute 12 bak a mamawh lo.

Seeded pangana Sloane Stephens chuan a American player pui Taylor Townsend chu 6-4, 6-2 a hnehin, inkhel dangah Aryna Sabalenka pawhin Anna Kalinskaya 6-1, 6-4 in a hneh ve bawk.

Grand Slam vawi nga champion tawh Maria Sharapova pawhin tun hma lama a champion tawhna hmunah a mikhual lo tih lantir nan, darkar khat leh minute thum chhungin Harriet Dart chu 6-0, 6-0 in a sawp.

Russian nula hian 2008 final-a a hlawhtlin tawhna Rod Laver Arena-ah kumina a Aus­­tralian Open match hmasa ber a khel a, a tir aṭanga tawp thlenga in­­khel thunun tluan chhuak­in hnehna a chang.

Kum 31 mi Sharapova chuan, "He hmunah hian tun hmain hun nuam tak ka hmang tawh, tun ṭumah pawh ka khingpui khelh fuh loh zarah boruak nuam tak ka tawng leh a ni," tiin a sawi.