Higuain-a'n chhuah a duh - Gattuso

AC Milan coach Gennaro Gattuso chuan tunlaia striker sawi hlawh tak Gonzalo Higuain chungchang sawiin, Argentina internatonal hian club thar neih a duh thu a sawi chiang.

Kum 31 mi Higuain hian nikum nipui lai khan season khat chhung atan AC Milan hi loan hmangin a zawm a, a club pangngai Juventus lama kir a tum loh thu a sawi lang tawh. San Siro-ah hian season chanve a hman chhungin inelna hrang hrangah goal riat a khung tawh a, striker mamawh Chelsea nen sawizawm mek a ni.

Italian manager Gattuso, "Pla­yer-in an duhthlanna an hmang tawh a nih chuan an rilru hmin let tura beih a harsa tawh. Higuain nen hian kan inpawhna a ṭha a, hmai chhanah thil chiang takin kan sawidun thei.

"Hmun dang a pan duh a nih pawhin keini tan chuan dan theih ngawt a ni lo, chutihrualin tunah chuan kan player duhlai a ni a, theihtawpin kan thawkho zel ang," tiin a sawi.

Argentine striker hi Napoli tan a khelh laiin Maurizo Sarri kaihhruaina hnuaiah a lo khel tawh a, tuna Blues manager ni ta Sarri nena inkawp rem sa an nih avangin a pu hlui hi zui a hreh lo nia sawi a ni.