India tan insiamṭhat a ngai

Vawiin chawhma dar 8:50 hian India leh Australia ten Adelaide Oval-ah 2nd ODI an khel dawn a, ODI hmasa zawkah Aussies-in hnehna an chan tawh avangin Men in Blue tan series la tur chuan chak ngei a ngai dawn.

ODI match hmasa berah India tan Rohit Sharma a che ṭha a, ball 129 lekah run 133 vaw chhuak mah se an chak zo chuang lo. India hian chak hmel hmu leh tur chuan captain Virat Kohli te an chet ṭhat a ṭul dawn a, Kohli hian ODI hmasa berah hian run thum lek a siam.

India hian ODI an khelh hma hian Asia ram zinga a hmasa ber ni turin Australia hi an ram ngeiah test series-ah an la a, hemi hma hian West Indies chu ODI leh test match-ah an hneh bawk. Kohli hote hi tun dinhmunah khawvela batting line up nei ṭha ber ang hiala ngaih a ni a, Australia laka thawh chhuah an tum tur hi a hmuhnawm ang.