Mangṭha Andy Murray?

Andy Murray chu Australian Open khelh ṭan niah Roberto Bautista Agut hneh loin a tla. Nimin tlaia darkai li leh minute kua an inkhelh hnuah tennis world number 1 hlui Murray hi 4-6, 4-6, 7-6, 7-6, 2-6 in a chak lo zawkah a ṭang a, British legend tan final vawi nga a khelh tawhna Australian Open bik chu a tawp anga ngaih theih a ni.

Grand Slam vawi thum champion tawh Murray hian a khel bawr na vangin tennis chu nuam ti taka a khelh theih tawh loh thu a sawi tawh. Nimin tlaia a chak loh hnuah Murray chuan, "Ka inkhelh chhunzawm theih nan ka theihtawp ka chhuah ang," a ti. A beisei angin vawi hnih a champion tawhna hmun Wimbledon-ah a inlan theih ngei a beiseiawm.

Melbourne Arena-a inkhelah Murray-a'n bul a ṭan fuh lo, an intawn hnuhnung vawi thuma set a hloh lohna lakah hian set hmasa pahnih a hloh nghal; set thumnaah thapui a thawh a, tie break-ah vannei zawkin Agut tlang nghal tur a dang hram.

Set linaah Murray-a'n huaisen takin a beih chhunzawm a, tie break hmang bawkin a khingpui a nih rual. Deciding set an khelh laiin season hmasa lama hliam vanga buai tawh Murray a chau tih a hriat a, a service vawi (2) hlohin a tlawm zawkah a ṭang.

Inelna ṭan hma hian Andy Murray chuan Wimbledon thleng khelh duh mah se hliam vangin Australia Open zawhah a chawlh theih thu a sawi lawk. Inelna buatsaihtu lam pawhin eng pawh thleng thei tih hriain Murray a pualin video an siam sa thlap a, a kawmna an neih laiin 'big screen'-ah tennis player lar Roger Federer, Rafael Nadal, Novak Djokovic, Kyle Edmund, Alexander Zverev leh Caroline Wozniacki ten duhsakna an hlan chu pholan a ni.

Spanish player Agut hi tun Australian Open inbuatsaihna nei ṭha berte zinga mi niin, January thla tir khan Qatar Open nomawi a chawi. He hlawhtlinna chang tur hian player langsar - world number 1 Novak Djokovic bakah, Stan Wawrinka leh Tomas Berdych te a hneh.

Tennis world number 2 Rafael Nadal-a'n match hmasa bera hnehna chang turin harsatna a tawk lo. Spanish tlangval hian khawtual tlangval wildcard hmanga inlan James Duckworth chu 6-4, 6-3, 7-5 a hnehin second round a lut.

Rod Laver Arena-a inkhelah Nadal hian darkar hnih leh minute 16 chhungin hnehna a chang. Grand Slam vawi 17 champion tawh Nadal chuan, "Duckworth-a ball vuak a piang mai kha a nain lo dawnsawn a harsa thei hle," tiin a sawi. Second round-ah chuan Matthew Ebden leh Jan-Lennard Struff te inkhela chak zawk a hmachhawn ang.

Duckworth hi tun hnaiah a vanduai thei hle, Grand Slam a khelh hnuhnung pathuma a match hmasa berah - Andy Murray, Alexander Zverev leh Marin Cilic te a hmachhawn a, second round a lut phak lo vek.

Inelna neih ṭan niah beisei loh result kan hmu nghal. Seeded pakuana John Isner chu world number 97 Reilly Opelka nen darkar thum chuang an inkhelh hnuah 7-6 (7-4), 7-6 (8-6), 6-7 (4-7), 7-6 (7-5) in a chak lo a, world ranking a sang 10 zinga tla hmasa ber a ni.

American player pahnih hian an service neih ṭhat an chhawrṭangkai dun hle, 6ft 10in-a sang Isner hian aces vawi 47 vaw chhuakin, a khingpui amah aia 1inch a sang zawk hian aces vawi 40 a nei phak ve tho bawk.

Inkhel dangah seeded pangana Kevin Anderson chuan Adrian Mannarino 6-3, 5-7, 6-2, 6-1 a hnehin first round a paltlang ve bawk. Aus Open-ah South African hian a kum zawnin vawi thum chu fourth round a lut thei a, kuminah pawh player hlauhawm pawl a ni leh ang.

Amaherawhchu, kum 32 mi Anderson hian darkar hnih leh minute 53 an inkhelh chhungin aces vawi 14 vaw chhuak mah se unforced errors vawi 38 a nei thung; round sang zawka player ṭha a hmachhawn hunah chuan tihsual neih tam loh a ngai dawn.