Champion lai Mizoram an tla

Khelo India Under 17-ah champion lai Mizoram chuan match hmasa bera an chetsual an tuar a, nimin inkhela Punjab 3-2 a an hneh chungin an tla. An group aṭang hian Punjab leh Karnataka ten semifinal an lut.

Mizoram hi group A-ah Karnataka, Uttarakhand leh Punjab nen an awm ho a, match hmasa berah Karnataka chu 4-1 zetin an hneh lo. Hemi chungchang hi sawiin Mizoram manager Lalenghluna (Maenga) chuan, "Pune pan hian ni nga kan zin a, kan zin tukah kan khelh nghal avangin ngai kan awh lo. Karnataka nen hian kan chesual tak meuh meuh a ni," tiin a sawi.

Mizoram hnehtu Karnataka hian Punjab an hneh lo a, champion lai hian Uttarkhand 4-1 a an hneh avangin semifinal beiseina a la awm. Nimin chawhma khan Mizoram hian Punjab lakah 3-1 in hma an hruai hman a, amaherawhchu hun tawpah goal chhuah lehin 3-2 in an chak a, an goal difference a tam tawk lo.

Champion lai hi Uttarakhand kutah an innghat a, semifinal an luh leh luh loh chu nimin tlai inkhelah a innghat. Amaherawhchu match pawimawhah Karnataka an chesual lo a, Uttarkhand 4-0 a an hneh avangin hmahruaitu an ni a, Mizoram an tlak phah bawk. Manager Maenga chuan, "Mizoram hian nasa takin hma a sawn a ni. Punjab hi nikum BC Roy Trophy final-a kan hneh kha an ni a, anni chuan team ngai an hruai a. Keini erawhin inkhelh thiam kan ngah ve bawk alawm tiin player dang chance kan pe a, semifinal thleng ta lo mah ila team ṭha bera ngaih kan hneh. A uiawm takzet a, chutihrualin vanneih ṭum chu ni se champion nawn thei turin kan ṭha tih chu kan result-ah a lang," tiin an vanduai thu Vanglaini a hrilh.