Fabregas tan match hmasa ber

Cesc Fabregas chuan Pathianni zan khan AS Monaco tana a match hmasa ber a khel a, Ligue 1 mawng lama talbuai lai hi Marseille nen 1-1 in an inhnehtawk.

Kar hmasa mai khan Fabregas hian Chelsea aṭangin Monaco hi a zawm a, tun hma lama Arsenal tana a khelhpui tawh Thierry Henry enkawlna hnuaia khel turin kum thum leh a chanve daih contract a ziak.

Stade Velodrome-a inkhelah Marseille lamin minute 13-na lekah Maxime Lopez-a goal hmangin hma hruai mah se, chawlhlawk hma deuhin Monaco lam hian Youri Tielemans hmangin an sut a, second half-ah goal dang a lut tawh lo.

Marseille winger Florian Thauvin-a goal khung chu video assistant referee (VAR) hman a nih hnuah pawm a ni lo a, table-a 19-na Monaco tan point khat hmuh belh hi chanchin ṭha a ni thei ang.

Season tir aṭanga talbuai Monaco hian manager thar Henry an neih hnuah pawh an la tho chhuak mai thei chuang lo a, midfielder tawnhriat ngah Fabregas an neih leh takah chuan beiseina thar an nei dawn, a him china awm Amiens chu point lia an phak loh avangin an hmabak erawh a la hautak dawn hle.