Mizoram hmeichhe football tan chanchin lawmawm

Khelo India Under 21 Girls-ah Mizoram chu team ṭha ber zinga mi Tamil Nadu nen 2-2 in an inhnehtawk a, group A-ah pahnihna niin semifinal an lut.

Mizoram hian match hmasa berah Himachal Pradesh chu 13-0 in an hneh a, national media thlengin fak an hlawh. Hemi hnu hian team ṭha zawka ngaih Odisha nen 1-1 in an inhnehtawk a, match hnuhnung berah point khat hlu tak Tamil Nadu laka an hlawhchhuah leh avangin inkhel dang result nghah kher ngai loin knockout stage an lut.

Nikum khan Khelo India Under 17-ah Mizoram hian group stage an paltlang lo a, tun ṭumah hian Odisha leh Tamil Nadu nen group khata an awm chunga semifinal an thleng hi chanchin lawmawm a ni. Tamil Nadu nen hian Mizoram tan Gladys Zonunsangi chuan minute 38-naah a khung a, amaherawhchu 2-1 a an hnufual reng hnuah Lalhriattiri Bawitlung chuan minute 81-naah goal pawimawh a khung.