PBL champion Bengaluru Raptors

India rama badminton inelna ngaihhlut Premier Badminton League chu Pathianni zan khan a hmawr bawkna neih a ni a, a vawi khat nan Bengaluru Raptors chuan Mumbai Rockets 4-3 a hnehin an champion.

Sree Kanteerava Stadium, Bengaluru-a inkhelah team pahnih an inkhel tawk hle a, match pawimawh leh hnuhnung berah Raptors tan mixed doubles duo Mohammad Ahsan leh Hendra Setiawan te chuan Gi Jung Kim leh Yong Dae Lee te ṭangdun chu 15-13, 15-10 a hnehin an team an chakpui a ni.

League round lamah palina ni mah se Mumbai Rockets lamin pahnihna Hyderabad Hunters chu semifinal-a an hneh theih avangin inrintawkna sang tak nen final an hmachhawn. Match hmasa ber chu Trump Match atan thlangin mixed doubles pair Pia Zabadiah Bernadet leh Gi Jung Kim te chuan Marucs Ellis leh Lauren Smith te hnehin dinhmun duhawmah an ding nghal. 

Bengaluru lam an zam bik lo, mipa singles khelh zui niin India tlangval Kidambi Srikanth chuan Andres Antonsen lakah 15-7, 15-10 a hnehna changin team pahnih dinhmun a inrual chiah.

Srikanth-a'n hnehna a chan vanga an boruak ṭhat vanglai takin Bengaluru hian mipa doubles chu Trump Match atan an thlang zui a, Vu Thi Thrang-a'n Shreyanshi Pardeshi 15-8, 15-9 a hnehin an dinhmun a siam ṭhat belh.

Mumbai lamin world number 14 Sameer Verma hmangin Sai Praneeth hnehin an beiseina siam thar leh mah se, match pawimawh ber ang hiala chhal ngam mixed doubles-ah Bengaluru chungnung zawkin nomawi an chawi.

Premier Badminton League hi khaw-vela badminton inelna zinga sum tamna ber a ni a, mahse mumal taka kalpui a nihna a la rei loh bakah season chawlh laia khelh ṭhin niin Badminton World Federation hnuaia inelna lian zingah a tel lo.

Kuminah hian team pakua - Hyderabad Hunters, Bengaluru Raptors, Awadhe Warriors, Mumbai Rockets, Delhi Dashers, Chennai Smashers, Ahmedabad Smash Masters, Northeastern Warriors leh Pune 7 Aces te an inel a, an inkhelh kual hnuah a sang paliin semifinal an lut.

Team tin hian match an khelh apiangin Trump Match vawi khat an thlang thei, hemi match bika hnehna an chan chuan point hnih hmuin an chak lo a nih chuan point khat paih sak an ni thung. Match dang zawngah erawh a chakin point khat an hmu a, chak lohin point paih a awm lo bawk. Team pahnihin trump match atan match inang an thlang thei a, match hrang a nih ṭum chuan trump match thlang lo zawk point hmuh dan chu a ngaiin a kal thung a ni.