LA Lakers-in an legend Bryant an sun

LA Lakers chuan Inrinni zing khan Staples Center-ah club legend Kobe Bryant sunna hun an hmang a, ṭhutna zawng zawngah Bryant-a jersey number 8 leh 24 an dah sa vek - hei hi inkhel entuten an thlawna an neih tur a ni. Bryant-a nupui Vanessa Bryant chuan Instagram-ah Bryant-te pafa ṭhutna tura zuah Mamba Jersey no. 2 (Gigi kawr) leh Lakers Jersey no. 24 (Bryant-a kawr) thlalak chu pho chhuakin, "Number 24 hi 2 tel lo chuan a awm thei  lo," tiin a ziak a, he ṭhutna pahnih tih loh zawngah hi chuan mipui an ṭhu khat vek.

Lakers star Lebron James chuan, "Lakers hi chhungkua tak tak a ni tih ka chhar chhuak a. Hetiang taka kan ui Kobe hian tun dinhmun thleng tur hian kum 30 chhung thi leh thau pawlhin thlan leh mittui far chungin darkar tam tak rim takin a thawk. Helai hmunah hian kum 18 a nihin a rawn kal a, kum 38 a nihin inkhelh a chawlhsan. Kum thum liam taah khan khawvela pa nih tling ber a ni hial ang. Kobe hi ka unaupa a ni a, amah aṭangin thil tam tak ka zir.

Kan inhmachhawn tawhna aṭangin chak duhna leh tumruhna amah aṭangin ka hriat belh. Kobe Bryant-a ṭawngkam takin 'Mamba Out' mah se kan ka aṭanga chhuak erawh 'kan theihngilh lo ang che' tih hi a ni," tiin Lakers legend thlahna thu a sawi. Bryant hian basketball khelh a chawlhsan khan 'Mamba Out' tih ṭawngkam a hmang a, Lebron-a'n he ṭawngkam bawk hi a thlah nan a rawn hmang leh bawk.

Kobe Bryant thlahnaah hian zaithiam lar Usher chuan 'Amazing Grace' a rawn sa a, Boyz II Men-in an national anthem 'Star Spangled Banner' an sa bawk. Bryant-a thih hnua Lakers match hmasa ber khelh chhunzawm a ni a, Portland Trail Blazers-in 127-119 in hnehna an chang. Nimin zing khan Lakers hian Sacramento Kings tlawh leh nghalin 129-113 in hnehna an chang thung.