India-in Asian Cup a mangṭha ta

"Milian mutthlu a tho mek a ni," tiin Indian football ngainatuten uar takin sawi mah se an thusawi boruakah a thamral a, India-in Asian Cup-a beiseina sang tak an neih chu mangṭha a ṭul ta. 

Thawhṭanni zan khan India chuan hun tawp dawna penalty avangin Bahrain chu 0-1 in an ngam lo a, Asia khawmualpuia football thiam ram 16 zinga tel an beiseina chu tihtawp a ni. 

India hian last 16 lut turin draw result chiah an mamawh a, mahse chhiarkawp dan aṭanga chhut pawha tlak theih dan nei tlem em em India an tla a, kum 2011 Asian Cup-a 5-2 a puanthuah tel tirtute khan kum riat hnuah 1-0 in India haw kawng an kawhhmuh leh ta. 

Blue Tigers hian hnehna chang zo lo pawh ni se UAE-in Thailand an hneh phawt chuan last 16 luh la beisei thei kha an ni a, mahse India tana rem lo tur zawng vekin engkim a thleng emaw tih mai tur a ni - team pahnih hi 1-1 in an inhnehtawk a, match hmasa ber khelh zawha hmahruaitu kha table mawngphahah an awm ta. 

India-in Group A-ah Asian football powerhouse an tih Iran, Japan, Australia leh South Korea-te a awmpui lo tih a chian rual khan Blue Tigers vanneih ṭum a inher chhuak dawn nia ngaihna a awm hman a, India tan last 16 luhna kawngka a inhawngah ngaih a ni. 

Blue Tigers hian match hmasa berah inkhel hmuhnawm tak pho chhuak nghalin chak tura ngaih Thailand chu 4-1 ngawtin an sawp a, he inkhelah hian Mizo tlangval Jeje Lalpekhlua chuan goal khat a khung ve bawk. 

Match hmasa ber khelh ṭum hian UAE leh Bahrain chu 1-1 in an inhnehtawk a, table chung berah India an awm - fans tam tak an lawm a, pathumna zinga a ti ṭha paliin last 16 an luh dawn avangin vawi khat chak hian India chu knockout round a thlen mai tura ngaihna a lian hman hle. 

Blue Tigers hian match hnihnaah UAE ngam viau mah se inelna thlengtu lakah vanduai takin 0-2 in an tlawm a, an khelh dan en erawhin India ṭantu ten Bahrain lakah beiseina an nei. 

India tan last 16 lut turin draw result chauh pawh a tawk - mahse he team hian match hmasa pahnih ang lo takin an khel chhe em em a, Thailand leh UAE tlarhnung vawi tam rumṭhaihtu khan Bahrain goal awmna an hai emaw tih mai tur a ni. 

Mahse, India hian vanneih thlak takin Bahrain hi goal khung loin an inhnehtawkpui mai dawn niin a lang hman - minute 90-na a ni a, vanneihnain India a bel reng ta bik lo. 

Bahrain laka captain armband hren tir Pronay Halder chuan India penalty area buai nuai karah ṭul lo takin Hamad Al Shamsan a ti tlu a, referee-in penalty spot a kawk zui. 

Jamal Rashed chuan he an hun ṭha neih hi goal-ah a chantir a, minute 90 chhunga Indian player langsar ber Gurpreet Singh Sandhu tan dan theih a ni lo - rei lote hnuah hun a tawp a, mittui nen India an tla.

India hian hnehna an chang zo lo a ni satliah lo, an khel chhe takzet a, Asia huapin India an mualpho a ni ber - heti teh thuta India khelhchhiat chhan zawn dawn chuan kut zung ṭangin a kawh hmasak ber chu coach Stephen Constantine a ni. 

English coach hian match hmasa pahniha khel ṭha tak mai Anirudh Thapa chu bench-ah dahin a aiah Rowllin Borges chu inkhel bul a ṭantir a, a ti fuh lo chiang hle - Goan midfielder hian a ball pass apianga  tisual emaw tih mai tur a ni. 

Mahse, inkhelh zawhah Constantine a insawifiah a, English coach chuan, "Thapa khan match hnih a zawna a khelh bakah a hnungzangah na a  nei deuh a, Borges bul ka ṭantir phah a, kan beisei angin thil a kal ta lo a ni," a ti. 

India hian inkhel ṭantir teah Anas Edathodika chu hliam vangin an chan nghal bawk a, hei pawh hi chhuanlama hman theih tak a ni. Constantine chuan ,"Minute khatnaa Anas lakchhuah ngai nghal kha kan ruahmanna tibuaitu pakhat a ni," tiin a sawi.

First half-ah India inkhel a hmuhnawm lo takzet a, Constantine-a'n Ashique Kuruniyan la chhuakin Jeje Lalpekhlua a luhtir a, Hnahthial tlangval hian danglamna a thlen thei bik lo mah se ball lo chelh din leh sem darh kawngah tun hma ang thoin a la ṭha reng.

Tlarhma lama Sunil Chhetri leh Jeje aiin tlarhnung lama Sandesh Jhingan leh Gurpreet Singh-te hmel hmuh a zing zawk a, Indian player ten ball an ken theih loh piah lamah an pass sual reng a, hmuh an hrehawm takzet. 

India attacking nat loh dan ngaihtuahin Blue Tigers hian hnehna chana hmahruaitu nih aiin a him dam zawnga draw result neiha last 16 luh an tum niin a lang hial a, Constantine chuan hei erawh an ruahman dan a nih loh thu a sawi. 

Kum 56 mi coach chuan, "Draw result hlawhchhuah tuma khel kan ni lo a, keini chuan kan tum ber chu hnehna chan a ni. Player ṭhenkhat kha chuan draw duhin an khel a ni mai thei a, mahse chu chu kan tum dan a ni lo," a ti - hlawhchhuah erawh an nei lo.

India coach Stephen Constantine chuan Bahrain an hneh loh hnuah India coach aṭanga a ban thu a sawi nghal a, English coach chuan, "Ka hun chu a tawp ta a, ka hmaa hna inchhawp chu ka hlen tawh a ni," tiin a ban thu a sawi. 

Hriat tel atana ṭha erawh Constantine hian Asian Cup zawh thleng bak hi India-ah contract a nei tawh lo a, last 16 an luh zawh loh avangin AIFF lamin contract thar an zawrh a rinawm tawh lo a, ban ngai loin a inthiarhlimah a ngaih theih.

Kum 2015-a a vawi hnih nana India coach ni tura lakluh Constantine chuan, "He team ka enkawl tirh aṭang khan ka tum ber chu Asian Cup khelh a ni a, chu chu kan puitlin thei a ni," a ti. 

Rwanda boss hlui chuan, "Player-ten an theihna zawng zawng an pek ṭhin avangin an chungah ka lawm takzet.  All India Football Federation (AIFF), Kushal Das (AIFF General Secretary), Praful Patel (AIFF President) leh Abhishek Yadav (National Team Director)-te chungah lawmthu ka sawi a ni," tiin thlahna thu a sawi. 

Kum 2002-2005 inkara India lo enkawl tawhtu coach hian kum 2015-a India a enkawl tirh hian FIFA ranking-ah India chu 173-na niin nikum khan top 100 huang chhungah a inhlankaipui a, kum riat hnuah Asian Cup a khelhpui leh bawk. 

Constantine enkawlna hnuaiah hian Mizo player zingah Jerry Lalrinzuala, Lallianzuala Chhangte, Lalruatthara leh Laldanmawia Ralte ten India tana an match hmasa ber an khel a, 2002-a India a enkawl hmasak khan Jerry Zirsanga chuan India tana a match hmasa ber a khel bawk.

India captain Sunil Chhetri chuan, "He ram tan hian hna ṭha tak a thawk a, kei leh player dangte aiawhin lawmthu ka hrilh a ni. A kalna apiangah hlawhtlinna a chan ngei ka duhsak," tiin coach hi a thlah.