Dhoni-a'n India a chakpui

India chuan Australia chu Adelaide-ah wicket rukin an hneh a, ODI series match thum khelh turah 1-1 in an inhnehtawk. ODI match hnuhnung ber hi January 18 zing dar 7:50 hian Melbourne Cricket Ground-ah an khel ang.

Nimin inkhelah hian Australia chu ṭhumvawrah chakin bat hmasak an thlang a, Shaun Marsh-a'n run 131 zet a siam avangin wicket kua hlohin run 298 an vaw chhuak a, India hmabak a hautak hle.

Men in Blue tan Rohit Sharma (43) leh Shikhar Dhawan (32) ten bul an ṭan chhe lo a, chak tur erawhin kawng a la thui hle. Virat Kohli-a'n captain mawhphurhna rawn lain run 104 a vaw chhuak a, India tan beiseina a rawn siam. 

MS Dhoni (55) chuan a tawnhriat hmang ṭangkaiin India chu wicket hloh belhtir a tum lo a, run a siam pah ve reng bawk. Dinesh Karthik erawhin risk lain ball 14 lekah run 25 a rawn siam.

Mamawh hun takah Dhoni a rawn inlar a, 'captain cool' an tih ṭhin hi captain a nih loh hnuah pawh a la cool reng. Over tawp berah run sarih siam a la ngai a, Dhoni hian six runs a vuak hnuah run khat a siam leh a, India-in hnehna an chang.