Mizoramin boxing-ah medal la dawn

Khelo India Youth Games-ah Mizoram boxer pathum Zorammuana (48kg), Laldinsanga (50 Kg) leh Lalthuthlungdiki (52 Kg) ten semifinal an lut. Boxing-ah hian third place zawn kher a nih loh avangin a chhe berah bronze medal pathum chu an lak belh dawn tihna a ni a, Mizoram team hi SYS coach pahnih Vulṭhavunga (coach) leh Lalbiaksangi (manager) ten an enkawl.

Mizoram aṭang hian boxer hian pariat an kal a, heng zinga panga hian quarterfinal an thleng pha. Under 21 a tel awmchhun Laldingliana (56 Kg) chuan Thawhṭanni zan khan quarterfinal-ah Haryana boxer Akash Kumar chu a hneh lo.

Nimin khan quarterfinal pali dang hi khelh a ni a, Under 17 vek a ni. 48 Kg-ah Zorammuana chuan Himachal Pradesh boxer Abhinav Katoch chu 3-2 in an hneh a, Laldinsanga chuan Uttar Pradesh boxer Javed chu 3-2 bawka hnehin 52 kg-ah Lalthuthlungdiki chuan Maharashtra boxer Aarya Kedar Kulkarni chu 3-2 thoin a hneh bawk.

Mizo zinga quarterfinal khel hnuhnung ber Lalawmpuia Sailo chu Haryana boxer Pardeep lakah a vanduai thung. Semifinal khelh hun hi a la chiang lo a, January 17 hian an khelh a rinawm a, Mizoram manager Sangtei chuan gold medal an inbeisei thu Vanglaini a hrilh.

Maharashtra khawpuia neih mek Khelo India-ah hian Mizoram hian gold leh bronze pathum ve ve leh silver pahnih an la mek.