Petr Cech a chawl dawn

Arsenal goalkeeper Petr Cech chuan season tawpah inkhelh a chawlhsan tur thu a puang a, "Ka hmaa chona inchhawpte chu ka hlen chhuak vek tawhin ka hria a ni," tiin a tan football mangṭha a hun thu nimin khan a sawi. 

Kum 36 mi goalkeeper chuan, "Premier League-ah kum 15 hun ka hman chhungin nomawi chawi theih apiang ka chawi kim a, ka tum ka hlen tawh a ni," a ti. 

Czech Republic tana vawi 124 inlantu goalkeeper hian kum 2004 khan Premier League hmelhriat ṭanin French club Rennes aṭangin Chelsea a zawm a, Blues-ah hian 2014-15 season thleng chamin Premier League (4), FA Cup (4), League Cup (3), Europa League leh Champions League nomawi a chawi hman. 

Kum 2015-ah Arsenal panin FA Cup nomawi a chawi leh a, tun season-ah Bernd Leno tluk loin bench-ah a hun tam zawk a hmang a, football a mangṭha tur thu a puang ta a ni. 

Cech chuan, "Arsenal-ah hian nomawi pakhat tal chawi leh turin theihtawp ka chhuah ang a, tichuan khelmual pawn lama ka hun hman dan tur ka thlir zui ang," tiin a sawi.