Serena Williams a hrang nghalSerena Williams a hrang nghal

Tennis hmeichhe player zinga Grand Slam chawi hnem ber nih tumin Serena Williams chuan Australian Open a hmachhawn a, American star hian nimin khan a match hmasa ber khelin Tatjana Maria chu straight set in a hneh.

Rod Laver Arena-a inkhelah Serena hian minute 49 chhung lekin 6-0, 6-2 in hnehna a chang, set hmasa zawk la tur phei chuan minute 18 bak a mamawh lo a ni. Second round-ah chuan Chinese player Peng Shuai hnehtu Eugenie Bouchard nen an inhmachhawn leh ang.

Kum 37 mi Serena hian Grand Slam title 23 a la tawh a, tun ṭumah hian a champion leh thei a nih chuan Australian legend Margaret Court (24 titles) nih rualin major title la hnem thei ber a ni ang.

Serena-i'n awlsam taka hnehna a chan lai hian vawi hnih champion tawh Victoria Azarenka erawh Laura Siege­mund lakah 6-7(5), 6-4, 6-2 in a tlawm thung. World number 1 hlui Azarenka hian 2012 leh 2013 khan Melbourne-ah hian nomawi a lo chawi tawh a ni.

Season hnih liam ta mai khan Australian Open-ah (AO) hian Serena-i'n thla khat mi fa pai chungin nomawi a chawi tawh a, a hnu lam season khat chhung erawh fa neih vangin a inkhel chhunzawm thei lo.

Tennis court chhunga a rawn let hnuah Serena hian hmun ṭhenkhatah duhsak tawk mah se, ṭhenkhatah erawh player dang ang bawka en niin duhsak bikna pek a ni lo; season hmasa lama a thawhrim vangin tunah hian seeded 16-na a ni phak.

Australian Open vawi sarih champion tawh Serena chuan, "He hmuna ka inkhelh hnuhnung ber kha chuan nau ka pai a, nomawi ka chawi zui phei kha chu ka hun tawn zinga nuam leh ropui ber pakhat a tling hial. Tunah chuan player dangte nena ang khatin ka inkhel ve leh thei ta, lawmna tur hlir a ni," tiin a sawi.

Nikum US Open final-a a chak loh hnuah Serena hian Hopman Cup chiah a khel leh a, he inelnaah hian Maria Sakkari, Belinda Bencic leh Katie Boulter te a hneh; inkhel tam lo mah se a theihna ang tak a khel chhuak thei a nih chuan champion tura rinkai ber zingah a tel phak.

Nimin Melbourne Park-a in­khel dangah Johanna Konta chuan tualchhung player Ajla Tomljanovic chu 7-6 (7-4), 2-6, 7-6 (10-7) in a hneh hram. Konta hian a match lehpekah chuan Gar­bine Muguruza a hmachhawn ang.

Grand Slam vawi hnih champion tawh Muguruza hian Saisai Zheng 6-2, 6-3 in a hneh a, a vawi thum nana major title lak tum Muguruza paltlang hi Konta tan a awlsam dawn lo.

Hmeichhe singles player langsar dang zingah - Anastasija Se­vastova, Elise Mertens, Ma­dison Keys, Karolina Pliskova leh Wang Qiang ten hnehna an chang ve bawk. Australian Open hi January 27-ah final khelh tur a ni.