Mahuma Memorial Chhinga Veng an chak nghal

Mizorama cricket inelna sang ber Mahuma Memorial Cricket Tournament chu Thawhṭanni khan khelh ṭan a ni a, Chhinga Vengin hnehna chang nghalin Armed Veng chu wicket hnihin an hneh. 

Suaka Cricket Ground-a inelna hi season dang ang loin match khat hi ni hnih chhung zel khelh a ni a, ṭhumvawra vannei zawk Chhinga Vengin vawm hmasak an thlang. 

Armed Veng hian first innings-ah run 65 siamin over 32.3 bak an tlin lo a, run siam hnem ber Ganjerder Singh chuan run 35 chiah a siam a, Chhing Veng tan Samik Das chuan wicket nga a la. 

Chhinga Veng an chuti lua bik lo - over 29.3 thleng tlinin run 87 an siam a, first innings-ah run 22-in hma an hruai.

Second innings-ah Armed Veng-in over 29.5-ah run 92 siamin an insiamṭha - mahse Chhinga Vengin over 26.4-ah run 71 rawn siamin Armed Veng run siam belhkhawm run 157 chu wicket hnih la nei chungin an rawn umpha a, an chak.