Zaninah Juve leh Milan

Italian Super Cup chu zanin dar 11:00 hian Jeddah, Saudi Arabia-ah khelh a ni dawn a, Italian champion Juventus leh AC Milan ten kumina an nomawi hmasa ber tur an inchuh dawn a ni.

Inelna hi Serei A champion leh Coppa Italia champion ten an khelh ṭhin a ni. Season hmasa khan Juventus hi an champion ve ve a, hei vang hian Coppa Italia final-a an hneh tak Milan nen an inkhel dawn.

Thlasik chawlh an hman zawh hnuah Massimiliano Allegri-a'n bul ṭan fuh a tum a, a player neih ṭhat ang chu a hruai. Mario Mandzukic leh Medhi Benatia te erawh hliam vangin an inlan thei dawn lo a ni.

Nikum nipui laia Turin pantu Cristiano Ronaldo chuan Juve tana nomawi hmasa ber chawi theihna hun a nei dawn a, Real Madrid forward tan hnuhma ṭha hnutchhiah turin chet ṭhat a pawimawh dawn.

Gennaro Gattuso-a'n Milan a enkawl tirah beisei phak lo mah se nikuma Coppa Italia final an luh theih avangin che chhe tak tia sawi tur a ni bik lo - hnehna an chang thei a nih chuan 2016 hnua nomawi an chawi hmasak ber a ni ang.

Milan manager hian a striker Gonzalo Higuain chuan chhuah a duh thu tun hnaiah a sawi a, Argentina international hi a club pangngai Juventus a kir duh tawh lo a nih avangin a inlan a nih chuan goal khung a tum ruh zual hle ang tih a rin theih.

Italian Super Cup-ah hian Juventus leh AC Milan te hi vawi sarih ve ve champion tawhin record nei ṭha ber an ni mek a, zanin chak zawk hian an elpui team kal pelin chungnung ber nihna an hauh dawn a ni.