Dan theih loh James Harden

James Harden chuan NBA regular season a hman ṭhat a chhawm nung zel. Nimin zing inkhelah Harden hian Memphis Grizzlies lakah point 57 ngawt score lehin, tun season chhunga match khata a score hnem ber ṭum a tawng; Houston Rockets chu 112-94 in hnehna a chanpui.

Harden hian tun hnaiah a zawnin match 17 chhung chu point 30 a score tling ziah a, tun hma lama point score hnem zawn record lo siam tawhtu Kobe Bryant-a record chu a khum ta chiah. Inkhel tir lam quarter hmasa pahnih bikah Harden-a'n point 36 a nei hman a, hei pawh hi Rockets tan record thar a ni nghal.

Rockets hian an player ṭha ṭhenkhat Clint Capela, Chris Paul leh Eric Gordon te chhawr thei lo mah se an khelh ṭhat a tluang rih a, an match hnuhnung 10 zinga pariatah hnehna an chang. Western Con­ference-ah palina din­hmun an luah leh tawh avangin playoff khel ngei tura ngaih an ni leh tawh.

Most Valuable Player nilai Harden hi season kal laiah pawh player hlu leh hmuhnawm berte zinga mi a ni leh mek, match tinah chawhrualin point 34.8 nei ziah ang a ni a, rebounds vawi 6.3 la zel ang a nih bakah assist ṭum 8.6 nei zel anga chawhrual a ni bawk.

Ningani zingah Rockets hian match an nei leh nghal dawn a, zing dar 6:30-ah Brook­lyn Nets nen an inhma­chhawn leh dawn a ni.