Manchester City damna Jesus

Premier League champion lai Manchester City chuan tun season a khel ṭha tak Wolverhampton Wanderers chu Thawhṭanni zan khan Etihad Stadium-ah 3-0 in an hneh a, nomawi humhim tumin hmahruai mektu Liverpool an um chhunzawm zel. City hian khelh zat inangah Jurgen Klopp-a naute chu point liin an pha lo a, Reds umphak an duh a nih chuan chetsual a thiang tawh lo.

Citizens tan Brazilian striker Gabriel Jesus chuan goal hnih a khung a, Wolves defender-te chetchhiat zanah Conor Coady chuan an lama a tihluh bakah French defender Willy Boly chu Bernardo Silva laka a tackle hlauhawm tak avangin first half-ah hnawhchhuah a ni bawk.

Pep Guardiola-a'n Argentine striker Kun Aguero aiah tun season a khel tha lo tak Gabriel Jesus a luhtir a, Kevin De Bruyne chu bench lamah dah a ni. League Cup semifinal-a Burton Albion nen an inkhelh ṭumin Belgian midfielder hi second half-ah lakchhuah a ni a, a lungawi lo tih thuthang awm chungin Spanish manager hian bul a ṭantir chuang lo.

City lamin Aguero leh De Bruyne chhawr lo mah se midfield laiah David Silva, Fernandinho leh Bernardo Silva te an la neih bakah tlarhma lamah player naupang rual Raheem Sterling, Leroy Sane leh Jesus te an luhtir avangin Wolves laka point thum hlawh chhuak thei tura ngaih an ni.

Wolves boss Nuno Espírito Santo-a'n Pep-a naute laka point khat hmuh hlutzia a hriatchian avangin goal venhim a ngai pawimawh hmasa a. Defence lamah player panga remin goal venhim lama a tlarhnung pui turin Portuguese midfielder tawnhriat ngah Joao Moutinho leh hmabak nei êng tak Ruben Neves leh Leander Dendoncker-te a rem bawk.

Player nei tha zawk Pep Guardiola-a'n player a remkhawm fuh zawk tih theih a ni a, inkhel ṭan phat aṭangin City lamin inkhel an thunun nghal. German winger Leroy Sane a hnawksak takzet a, Wolves defender-te'n an veng hneh meuh lo. Minute 10 a liam meuh chuan Sane siam sak chu Gabriel Jesus-a'n City goal hmasa ber ni turin a khung. Mikhual team buaina belhchhah turin darkar chanve pawh a liam hmain Wolves defender Willy Bolly chuan ṭul lo taka Bernardo Silva a tlawh avangin hnawhchhuah a ni a, team chhe zawkin kim loin an khelh a ṭul phah.

Khualmuala khel leh player pakhata tlem zawk Wolves tan chak beisei ngam a ni tawh lo. First half tawp hma hretin Raheem Sterling chu box chhungah Ryan Bennett-a'n a tihtluk avangin peanlty a chawi a, Jesus rawn pen chhuakin Brazilian forward hian cool zetin he inkhel a goal hnihna a khung.

Second half lamah tun hnaia goal khung uar tak City lamin goal an khung belh nual rin nimahse an beisei ang ngawtin Wolves an ṭhiat darh thei bik lo. Pep-a'n bench aṭangin De Bruyne, Ilkay Gundogan leh Aguero te rawn luhtir mah se Wolves an ṭangkhawng ve tlat a, City lamin goal an khung belh mai thei lo. 

Inkhel tawp dawn lamah Wolves player-te an chau tih a hriat a, City lamin an nawrbeh reng avangin ball an chang hman meuh lo. Kevin De Bruyne a rawn inlar a, minute 78-naah Belgian playmaker ball vawrhluh hi Conor Coady chuan an lamah a a dang pial lut a, Portuguese goalkeeper Rui Patricio tan dan theih a ni lo. 

City leh Wolves an inthlau takzet a, inkhelh chhungin Pep-a naute'n vawi 870 zet an in-pass theih laiin Wolves lamin vawi 271 bak pass an nei thei lo. Manchester khaw club lamin goal khung tumin ṭum 15 zet goal attempt an nei a, Wolves lamin first half-a attempt pakhat an neih bak minute 90 chhungin an neih belh tawh lo. Krismas vuakvetah Pep-a naute chesual zeuh mah se ngai an awh leh tawh tih theih a ni a, tun hnaia an khel hnuhnung pathumah goal 19 ngawt an khung a ni. 

Manchester City manager Pep Guardiola chuan, "Player sawm zetin goal venhim an tum avangin player pakhatin tam mah ila inkhel awlsam a ni lo. Na zawka kan nawr a ngaih avangin De Bruyne ka dahlut a, box chhungah vawi sawm vel lai chu a cross a ni. Tun ang hian kan khelh reng theih a ngai a ni," tiin a awlsam loh thu a sawi.

Wolves coach Nuno Espirito Santo chuan, "Red card kha inkhel thlak danglamtu chu a ni. Goal kan chhuah danah pawh insiamṭhat kan ngai hle. Ka nauten theihtawp an chhuah a, inkhel kan hmachhawn hmasak leh ber tur erawh kan khelmualah a nih avangin theihtawp kan chhuah a ngai dawn a ni," tiin player 10 nen chuan Premier League champion lai chu elphak rual an nih loh thu a sawi.