Danmawia goal a tawk lo

East Bengal tan R. Laldan-mawia'n goal khung mah se a team chakpui nan a tawk zo lo a, I League hmahruaitu Chennai City lakah 1-2 in an tlawm. 

Chennai khelmualah East Bengal tan Danmawia hian minute kuana lekah goal hmahruai a khung a, Sialhawk Express tia hriat lar hian tun season-a league goal li a khungna chiah a ni.

East Bengal-in beisei aia hmaa goal an khung avangin fan-te hahdam takin an awm hman a, goal dang lut loin chawlhlawk an hmang.

Mahse, Kolkata club beisei angin engkim a kal lo a, second half-in thawnthu dang a her-chhuahpui - Chennai tan Pedro Manzi leh Alexander Jesuraj te chuan goal an rawn khung a, 2-1 in Chennai City an chak daih. 

East Bengal tan hian Danmawia bakah captain Lalrindika Ralte chuan inkhel bul a ṭan a, Brandon VL Remdika chu Danmawia thlak turin bench aṭanga luhtir a ni a, Lalramchullova chu hrem vangin a inlan thei lo thung. 

I League match 12 khelh tawhah Chennai City hi anmahni hnaih bertu Churchill Brothers aiin point ngain an sang fal tawh a, champion an hnaih zel. 

East Bengal erawh a vawi khat nana I League champion nih an tumna a thamral chhunzawm zel - Chennai aia match khata khel tlemin hmahruaitu hi point riatin an thlau mek.