Inringtawk takin Zverev a chak

Alexander Zverev chuan a Grand Slam nomawi hmasa ber chawi turin a inpeih tawh tih lantir nan nimin khan Aljaz Bedene sawpin Australian Open second round a lut a, champion lai Roger Federer pawh Thawhṭanni tlai khan nuamsa takin a lo tlang tawh bawk.

Rod Laver Arena-a inkhelah German tlangval hian darkar khat leh minute 55 chhungin world number 67 lakah hian 6-4, 6-1, 6-4 in hnehna a chang, second round-ah chuan Jeremy Chardy leh Ugo Humbert te inkhela chak zawk a hmachhawn leh ang.

Australian Open-ah Novak Djokovic, Rafael Nadal leh Roger Federer te chu Zverev aia ranking sang an ni a, 'Big Three' ho dipna karah hian a tal chhuak thei dawn em tih chu hunin a la hril ang. Nikum khan South Korean rawlthar Hyeon Chung lakah a tlawm tih erawh hriat tel a ngai.

Amaherawhchu, German tlangval hian nikum khan Grand Slam vawi riat champion thei Ivan Lendl chu coach atan lain, season tawpa inelna ngaihhlut ATP Tour Finals-ah pawh a champion thei hial - inrintawkna sang tak nen season bul a ṭan leh hi a mak lo.

Australian Open champion lai Federer chuan a match hmasa berah Denis Istomin chu darkar hnih tling loah 6-3, 6-4, 6-4 in a hneh a, second round-ah Dan Evans nen an inkhel leh ang.

Switzerland star hi kum 37 mi ni tawh mah se court chhungah a la che thei hle, inkhel tir aṭang a tawp thlengin nghet takin a ding thei. Vawi ruk a champion tawhna hmunah hian nomawi a chawi leh thei a nih chuan Australian Open bika record nei ṭha ber a ni dawn a ni.

Grand Slam vawi 20 champion tawh Federer chuan, "Denis kha awlsam taka hneh theih a ni lo, a thawhrim avangin a harsa hle. Set thum chhunga hnehna chan theih hi thil ṭha a ni a, nikum ang bawkin court chhunga hun rei lo thei ang ber hmang chunga tlang leh ka tum ang," a ti. Inelna a rei dawn avangin thahrui khek a ngaihzia a hrechiang hle.

Nimin Melbourne Park-a inkhel dangah Kei Nishikori a vannei hle. Japan tlangval hian a khingpui Kamil Majchrzak lakah set hmasa pahnih chu 6-3, 7-6 (8-6) in a hloh nghal.

Mahse, set thumna an khelh laiin Majchrzak hi a chawn tha a chat a, 6-0 a set hlohin a inkhel zui thei lo bawk - dinhmun ṭha lo taka ding hman Nishikori a tlang theih phah. Majchrzak-a'n world ranking-a a sang 50 chin player a hmachhawn hmasak berah beiseina nei sang viau mah se a beiseina chu hliam vangin a thamral.

Kum 2014 US Open finalist Nishikori chuan, "Tun ṭuma chak zawk chu Majchrza a ni. A khel ṭha em em a, a hnu a khar dan erawh a pawi ka tihpui takzet. A tlang zawk ka nih avang chuan ka lawm a, match lehpekah chuan tun aia ṭha zawk hian ka khelh theih ka beisei," tiin a sawi.

Season hmasa khan kum 29 mi Nishikori-a'n ban rek hliam vangin Australian Open hi a khel lo, kuminah erawh inbuatsaihna tournament pakhat Brisbane International-ah a champion theih avangin beiseina a nei sang, mahse duhthusam chuan bul a ṭan thei ta lo a ni.