Huddersfield leh Wagner inṭhen

Premier League club Huddersfield Town leh an manager David Wagner te chu inhriatthiam tawnna in an inṭhen. Terriers hi league table mawngphaha awm mek an ni a, a him china awm Cardiff City an phak lohna chu point riat a ni.

German manager hian 2015 November thla khan khatih hunlaia Championship club Huddersfield kha a enkawl ṭan a, English football inelna sang ber kai puiin, EPL-ah hian season hnih hun a hmang tluan zo ta lo.

Season hmasa pawh khan Terriers hi tla thei tura ngaih an ni hman. Mahse, Wagner hian 16-na nih puiin, tun season-ah erawh match 22 an khelh tawh chinah point 11 chiah an la hmuh theih avangin a chungah rinna an nghat tlang ngam lo hi a mak hran lo.

Club chairman Dean Hoyle chuan, "David kaihhruaina hnuaiah Huddersfield Town hian hun lawmawm tam tak kan tawng a, a nihna takah chuan tun hnai kum 50 chhunga kan hun tawn nuam leh sang ber pawh kan tawng hial. A hna thawh leh sulhnu hi theihnghilh theih a ni lo ang.

"Ani nena thawhhona tih tawp hi kan ngaihtuah ngai lo a, mahse tuna kan dinhmun thlirin ngun taka kan ngaihtuah ho hnuah inhriatthiam tawnna a inthlah hi a fuh berah kan ngai, a hun hman zel turah duhsakna kan hlan," tiin a sawi.