Haaland-a'n goal khung zel dawn em?

Borussia Dortmund-in zanin dar 8:00 hian Weserstadion a tlawh dawn a, an khingpui tur Werder Bremen hi 17-naah an awm mek. Bundesliga-a team pahnih awmna thlir chuan inkhel hmuhnawm tih tur a ni lo a, amaherawhchu Dortmund forward Erling Haaland vangin inkhel en a châkawm.

Norwegian forward Haaland hian goal a keng tel. Dortmund laka a inlan hmasak berah Augsburg hmachhawnin minute 23 chhungin hattrick a siam nghal. Bundesliga-a goal khungtu ropui Robert Lewandowski-a'n minute 85 danah goal a khung a, Haaland erawh minute 38 danah goal a khung zel.

Haaland hi Bundesliga match hmasa bera hattrick siam thei pasarih zinga mi a ni a, substitute aṭanga luta hattrick siam erawh a mah chauh a awm. Chutihrualin Walter Bechtold-a'n kum 1965 khan kum 19 leh thla ruk mi niin niin Eintracht Frankfurt tan hattrick a siam a, Haaland aia Bundesliga-a hattrrick siam naupang awmchun a ni. Mahse Haaland erawh Bundesliga-ah football career a ṭan lo tih hriat a ṭha a, Bechtold-a'n hattrick a siam hnu kum sarihah Erling-a pa Alf-Ing-a a piang chauh.

Norwegian forward hi match hmasa pathuma goal sarih khung thei hmasa ber a ni a, match hmasa pangaa goal riat khung thei hmasa ber a ni bawk. Haaland hi Bundesliga-ah chauh che ṭha loin Champions League-a PSG an hneh ṭum pawhin goal hnih a khung a, Red Bull Salzburg tana khelh laia a goal khung nen belhkhawmin Europe-a inelna sang berah top scorer a ni mek.

Mipui hriat châk erawh Haaland hian goal a khung zel dawn em tih leh season tawpah Borussia Dortmund hi an hmelma Bayern Munich chungah an awm ang em tih hi a ni.

Chutihrualin RB Leipzig hi Julian Nagelsmann hnuaiah Bundesliga champion thei zinga mi an ni. German club hian Champions League-ah Tottenham Hotspur an hneh a, nomawi beiseina chhi nung turin zanin hian Schalke an hneh ngei a ṭul ang.