Khelo India Youth Games: Football-ah Mizoramin medal dawng dawn em?

Mizoram chuan Khelo India Youth Games-ah football team pathum an tir thei a, champion lai Under 17 boys-in semifinal thleng pha lo mah se Under 21 boys leh girls team-in knockout stage an lut. Vawiin hian final khel tur zawnna neih a ni dawn a, tlai dar 5:00-ah Mizoram U21 mipa team hian Goa an hmachhawn dawn a, hmeichhe team hi champion rinkai Manipur nen tlai dar 3:00-ah an inkhel ang.

Group stage-a khingpui hneh vektu Mizoram mipa team hi final thleng tura rinkai an ni a, hmeichhe team erawh semifinal an thleng pha ringawt pawh hi a ropui tawh a, an tan Manipur hneh a harsa dawn.

Team inelnaa Mizoramin medal a beisei a nih chuan Under 21 football team tan kawng a awm a, coach Chawngthansanga kaihhruai team hi champion rinkai an ni pha.

Semifinal thleng tur hian Maharashtra, Chandigarh leh Kerala an hneh vek a, heng inkhel pathum hian coach Chawnga hian squad a siksawi char char bawk.

Coach Chawnga chuan, "Mizoram Premier League zarah player ṭha chhawr tur ka nei a, kan team-a player tin hi an intluk tlang em em a ni. Tute pawh lut se hna ṭha tak an thawk vek zel a, semifinal lut tur pawh thlan a harsa a, amaherawhchu hei hi chu chanchin ṭha lam a ni," tiin Vanglaini a hrilh.

Mizoram hian match tinah goal thum an khung tling vek a, an khingpui tur Goa hian point ruk hmuin semifinal lut mah se group match hnuhnung berah Punjab lakah goal thum an chhuah a. Mizo rawltharte hian thlan tur pahniha awm a team nem zawk an khelhpui dawn niin a lang. 

Manager Hmingthansanga chaun, "Semifinal aṭang hian yellow card hmuh zawng zawng an thai bo a, kan thaw huai e. Chuti chu ni lo se player paruk vel zet yellow card hmu an awm avangin final khel lo thei dinhmuna ding an awm a, awm a nuam lo hman hle. Kan dam kim bawk a, chak ngei tumin kan theihna zawng zawng kan chhuah ang," tiin a sawi.

Mizoram leh Goa te hi Pune City FC khelmual Shree Chhatrapati Shivaji Sports Complex, Balewadi-ah an inkhel dawn.

Under 21 team hi Chhawngthansanga (coach), Hmingthansanga (manager) leh C. Zirliana (assistant manager) ten an enkawl. Semifinal pakhat zawkah Punjab leh Kerala te an inhmachhawn bawk ang.

Mizoram hmeichhe team-in nikum Khelo India Under 17-ah group stage an paltlang zo lo a, kuminah coach Vanlalpeka leh manager Suzan L Ralte te kaihhruaina hnuaiah semifinal an thleng.

Champion rinkai Tamil Nadu leh Odisha awmna group aṭanga semifinal an thleng hi hlawhtlinna a tih theih a, chutihrualin khawvel thlirna aṭang chuan medal lak phak a ṭul thung. 

Mizoramin hmabak hautak zet patlang a ṭul dawn a, Manipur hian Bihar 4-1 zeta an hneh avangin khelh an harsa dawn.

Kim ṭhapa khelh pawhin Mizoram hi dinhmun chhe zawk an ni a, tun ṭumah erawh damlohna vangin an buai tel.

Mizoram coach Vanlalpeka chuan, "Kan striker rinrawl Miriami a damlo thut a, kan playmaker Hriati leh captain Feli te pawh an nuamsam lo a, player dangah 100% fit lo an awm bawk. Kei pawh hritlang khawsikin min man a, a buaithlak khawp mai," tiin Vanglaini a hrilh.

Mizoram coach hian an thil ei a 'masala' tam lutuk chu an buaina chhan niin a ngai a, chuvangin an harsatna hi 'food poisoning' angah a ngaih theih. Amaherawhchu Mizoram an hnual lo a, Peka chuan, "Tun hi kan tan hun ṭha a ni a, bawhpelh kan tum lo. Keini tan chak loh hi mualphona a ni lo a, pressure nei loin kan khel ang a, final thlen ngei kan tum ang," tiin a sawi. Manipur leh Mizoram te hian Police Ground-ah semifinal an khel ang.