Bruno Fernandes-a'n United chakpui thei lo

Manchester United chuan Inrinni zan khan Wolverhampton Wanderers an mikhual a, an player thar Bruno Fernandes bul ṭantir nghal mah se goal awm loin Old Trafford-ah an inhnehtawk. Ole Gunnar Solskjaer hoten dinhmun siamṭhatna hun ṭha an hloh avangin Champions League khel pha china awm Chelsea chu point rukin an pha lo.

Pound maktaduai 47 man Bruno Fernandes vangin Manchester United inkhelin ngaihven a hlawh thar a, Solskjaer-a'n bul ṭan tura a dah nghal avangin Bruno Fernandes chungah mipui mit a fu.

Inkhel ngaihven hlawh ni mah se inkhel erawh a nung lo. Goal chance hmuh tur a awm meuh lo a, Wolves forward Adama Traore-a'n United tlarhnung tan buaina a siam. Portuguese midfielder Bruno Fernandes-a'n ball chang fuh thei meuh lo mah se first half-a United tana goal zawna pet awmchhun a ni.

Second half-ah Raul Jimenez goal khung tur chu United keeper David de Gea-a'n ṭha zetin a dang a, Romain Saiss-a'n goal khungna hun ṭha a hlah bawk. Chutihrualin second half-a chance nei ṭha zawk erawh United an ni a, Bruno Fernandes freekick leh Juan Mata shot-te chu goal-ah 

a lut teuh.

Hun tawp hma hretin Aaron Wan-Bissaka cross chu United substitute Diogo Dalot-a'n goal pawnah chiah tauh a, Solskjaer-a hote point khatah an lungawi a ṭul. Wolves hian second half-ah Daniel Podence an luhtir a, goal hmaah a hriam tawk lo.

Manchester United ṭantute au hla pakhat chu 'Bruno, Bruno' tih a ni a, Portuguese midfielder hian point thum hlawhchhuahpui lo mah se a thiamna a pholang tho.

Bruno Fernandes hian ball vawi 111 a khawih a, vawi 88 pass chhuah a tum zinga 77 chu a khingpuite lamah a ni a, ball chhuhsak vawi ruk neiin goal zawnah vawi thum a pet. 

United manager Solskjaer chuan, "Bruno hian theihna sang tak a nei tih a lantir a, a khelhpuite a hriat chian hunah chuan tun aiin a la hmuhnawm dawn. Player ṭha tak kan lalut a ni," tiin an player thar khelh danah a lungawi thu a sawi.