Vawiinah boxing semifinal

Khelo India Youth Games 2019-ah Mizo boxer pariat an tel a, chung zinga pathum Zorammuana (48kg), Laldinsanga (50kg) leh Lalthu-thlungdiki (52kg) ten semifinal an lut a, vawiin hian final luh tumin an khel dawn. 

Tuipui rawlthar Zorammuana hi Aizawl SAI-ah a awm mek a, 48 kg-a semifinal lut tur hian Anan Yadav (Madhya Pradesh) chu 5-0 in a hneh a, Himachal Pradesh boxer Abhinav Katoch chu 3-2 in an hneh leh bawk. Vawiin hian Haryana boxer Kabir Pandit a hmachhawn dawn.

Lunglei rawlthar Laldinsanga hi Lunglei SAI-ah a awm a, Himachal Pradesh boxer Virender Singh leh Uttar Pradesh boxer Javed chu 5-0 leh 3-2 in a hneh a, 50 kg-ah semifinal a lut. Dinsanga hian semifinal-ah Naveen Siwach (Haryana) nen an inhnek ang.

Under 17 hmeichhe 52 kg-ah Lalthuthlungdiki hi Lawngtlai tleirawl a ni a, Aizawl SAI-ah awmin semifinal lut turin Maharashtra boxer Aarya Kedar Kulkarni chu 3-2 in an hneh. Lalthuthlungdiki hian final lut tur hi Saraswati Boro (Assam) nen an zawng dawn.

Mizoram team hi SYS coach pahnih Vulṭhavunga (coach) leh Lalbiaksangi (manager) ten an enkawl a. Manager Sangtei chuan, "Kan naute an khelh ṭha a, inpuahchahna hun nei tam phei ilang chuan hei aia tam hian medal kan lak ka ring. Hun chep tak karah hetiang dinhmun kan thleng thei hi kan lawm hle a ni," tiin Vanglaini a hrilh.

Coach Vula chuan, "Final kan thlen theih vek hi chu kan beisei ve khawp mai a, chutihrualin semifinal chinah chuan an ṭha vek tawh a, vanduai theih a ni. Thu lawmawm chu Mizo mipa pathum  Zorammuana, Laldinsanga leh Lalnunzira te chu India camp a an awm turin an ko a ni," tiin a sawi ve bawk.

Maharashtra khawpuia neih mek Khelo India-ah hian Mizoram hian gold leh bronze pathum ve ve leh silver pahnih an la mek.