Aizawl FC leh Lajong U-18 inhnehtawk

India rama kum 18 hnuai lam tana club football inelna Hero Elite League playoff-a an match hmasa berah Aizawl FC chuan point an hlawh chhuak nghal a, Shillong Lajong nen 1-1 in an inhnehtawk. 

Mizo club tan Lal-chungnunga chuan minute 51-naah goal hmahruai a khung a, Aizawl FC hian he goal hi hnehna an chanpui mai dawn nia a lan hnuah Parvaj Bhujya chuan minute 90-naah si phurh sutna goal khungin point an insem ta a ni. 

Hero Elite League playoff-ah hian team 10 awmin group hnihah team panga ve ve awmin ṭhen an ni a, group-a a sang pahnih bakah pathumna pahniha a ti ṭha zawkin final round an lut ang - final round-ah hian team 11 tling tawh sa ho an zawm ve leh ang. 

Aizawl FC hi Group B-ah Shillong Lajong, Jamshedpur FC, Kerala Blasters leh Raman Vijayan Soccer School te nen an awmho a, Zirtawpniah Kerala Blasters nen an khel leh dawn. 

Hero Elite League playoff hi Goa-ah khelh niin January 24 thleng khelh a ni dawn a, January 27 aṭangin final round khelh ṭan leh a ni ang.