Kane a chawl rei dawn

Tottenham Hotspur forward Harry Kane chu a ngalrek vei lam hliam vangin thla hnih chhung a chawlh a ṭul dawn.

England captain hi Pathianni zana Wembley Stadium-a Manchester United an hneh loh ṭumin a inhliam a, League Cup semifinal second leg-a Chelsea nen an inkhelh tur bakah Champions League last 16-a Borussia Dortmund nen an inkhelh hunah a inlan thei dawn lo.

Spurs thu chhuak chuan Kane hian March thla tirah training a ṭan thei dawn chauh thu an tarlang a. English striker inhliam bakah hian Son Heung-min chuan Asian Cup khel tura a kalsan avangin Tottenham tlarhma chuan a tuar ngei ang. 

Tottenham captain Hugo Lloris chuan, "Kan team tana Kane-a pawimawh zia kan hre vek a, amaherawhchu amah chauh hi kan innghahna a ni lo. Football-a pawimawh ber chu team a ni a, khelh ṭhat chang leh hun harsa tawh hun chang a awm a, eng hun pawh chu nise kan inpeih tur a ni," tiin Kane tel loa khelh an zir a ṭul thu a sawi.

Spurs hian January-ah ringawt pawh match li an la nei a, Fulham (Jan 20), Chelsea (Jan 24), Crystal Palace (Jan 27) leh Watford (Jan 30) te an hmachhawn dawn. Chelsea nena an inkhelh tur hi League Cup semifinal second leg a ni a, first leg-ah 1-0 in hnehna an chang tawh.

February leh March thlaah fixtures hautak zawk a awm a, Newcastle (Feb 2), Leicester City (Feb 10) leh Borussia Dortmund (Feb 13), Burnley FC (Feb 23),  Chelsea (Feb 28), Arsenal (Mar 2) leh Dortmund (Mar 5) an hmachhawn chho dawn. Champions League bakah league-a Blues leh Gunners nen an inkhel tur hi derby a nih dawn avangin a hautak lehzual ang.

Kane bakah Son a awm dawn lo. English leh Korean forward te hi Spurs-in league-a an goal khung 31-ah an inrawlh a, chu chu 37% zet a tling.

Mauricio Pochettino tan thlak theih loh pahnih thlakna zawn a ṭul a, a vanneihna chu January transfer an la inkhar lo a, a vanduaina erawh stadium sa mek an nih avangin sum hmna tur a nei kher lo ang.

Argentine manager Pochettino tan Fernando Llorente a pawimawh dawn niin a lang a, Spanish forward hi a club hlui Athletic Bilbao lamin hel mek mah se an chhuah phaltir a rinawm ta lo. Kum 33 mi 6ft 4in a sang hian tun season-ah goal li a khung tawh.

Poch-a game plan-ah Vincent Janssen a tel lo niin sawi a awm a, kum 24 mi Dutch striker hi July 2016-a pound maktaduai 17 zeta lakluh a nih avangin theihna a a nei tih chu a chiang. A ke hliam vanga a chawlh vang vang hnuah tun thlatir khan Under 23 tan a inlan tawh a, bench aṭang tala a luh a rinawm.

Asian Cup final hi February 1 daih a ni a, South Korea-in an thleng a nih chuan Spurs harsatna belhchhah a ni dawn. Chuvangin London club hian transfer-ah player man tlawm tawnhriat nei ṭha an zawn a ṭul niin a lang.

Kum 31 mi Giuseppe Rossi chu club nei loin a a awm mek a, Italian forward hi Ole Gunnar Solskjaer hnuaiah training a zawm a, Sir Alex Ferguson-a'n training a tlawh ṭum pawhin a ti goal a, United-in contract ziah pui an tum loh avangin lak theih a ni.