FA Cup lamah Newcastle an kal zel

Thawhlehni zan FA Cup replay inkhelah Premier League club Newcastle United chuan club lian tluchhe ta Blackburn Rovers chu an khelmual Ewood Park-ah 4-2 in extra time-ah an hneh hram. Magpies leh Rovers te hi St James Park-ah 1-1 in an inhnehtawk a, tun ṭumah hian hun pangngaiah 2-2 in an inhnehtawk a ni.

Rafael Benitez-a hote hian fourth round-ah Premier League club Watford chu January 26 hian St James Park-ah an mikhual dawn. League-ah point 18 hmuin 18-naah an awm mek avangin Spanish manager tan league leh FA Cup-ah ngaih pawimawh tur zawk thliar hran a ṭul ang.

Newcastle United-in minu­te khat pawh ral hmain an academy aṭanga inzirchhuak Sean Longstaff hmangin goal hmahruai an khung a, minute 22-naah Callum Roberts chuan Jacob Murphy thawhrah sengin goal hnihna a khung a, darkar chanve ve em pawh khelh hmain 2-0 in hma an hruai der.

Amaherawhchu, Blackburn-in Adam Armstrong (33') leh Darragh Lenihan (45+1') hmangin first half-ah an siphurh an sut vek a, second half-ah goal a luh belh lo. Extra time-ah squad nei ṭha zawk an vannei a, Real Madrid tan pawha khel tawh Joselu chuan goalkeeper tihsual nangchingin first half injury time-ah goal a khung. Substitute Ayoze Perez chuan second half ṭan chiahah khung lehin Newcastle-in 4-2 in hnehna an chang hram.

English club lian tehnaah 'Premier League nomawi chawi tawh' tihna awm se Blackburn tan hmun a awm ang. Amaherawhchu Rovers hi India rama hmunpui nei Venky's London Ltd in an lei hnuah Premier League aṭangin an tla a, tun thlengin an la tho chhuak lo.

Blackburn manager Tony Mowbray chuan, "Goal hnih kan chhuah hnuah kan chhanglet thei khan kan rilru put hmang a lang a, ka lawm takzet. Kan chak lohna chhan erawh linesman vang a ni a, goal thumna kha a offside chiang a ni," tiin a lungawi loh thu a sawi.

Newcastle mana­ger Rafael Benitez chuan, "Kan tlang theihna tura kan ngaih squad kan thlang a, Watford nen pawh kan kalphung kan thlak lo ang," tiin a sawi a, player naupang zawk te khelh danah a lungawi thu a sawi.

Magpies hian season ṭantirh match hmasa 10-ah chak hmel an hmu lo a, manager Benitez meuh pawhin table hnuai lama awm tur thu a sawi tawh a, an relegate loh chuan thil mak a nih tur thu a sawi tawh.

Newcastle hi tun dinhmunah 18-naa an awm mek avangin tla thei dinhmunah a ding a, an chung chiaha awm Cardiff City chu point khat chiahin pha lo mah se Premier League khelh zel an duh a nih chuan FA Cup aiin league lam an ngaih pawimawh a ṭul ang.