Beisei pha lo Man Utd

Manchester United chuan Ningani zanah Club Bruges nen Europa League last 32 first leg-ah an inhnehtawk a, February 27 zan hian Old Trafford-ah second leg an khel leh ang. Ole Gunnar Solskjaer-a hote hian Pathianni zan dar 7:30 hian Premier League-ah Watford an mikhual dawn. 

Jan Breydel Stadium-ah ruahsur leh thli vangin inkhelh a awlsam lo a, team ṭha zawka ngaih Manchester United-in beisei an pha lo. Club Bruges keeper Simon Mignolet ball petchhuah chu Emmanuel Dennis-a'n minute 15-naah keeper Sergio Romero a pet khum nan a hmang a, Argentine keeper hi a tlanchhuah hma hret avangin goal luh chhanah mawhphurtuah a ṭang.

Nigerian striker Dennis a hmuhnawm zui a, United tlarhnung tan a hnawksak hle. French forward Anthony Martial-a'n a tlan chakna hmanga Club Bruges tlarhnung paltlangin Liverpool keeper hlui Simon Mignolet venah siphurh a khung.

Kum 2015-a pound maktaduai 36-a Monaco aṭanga United zawmtu Martial hian tun season-ah goal 14 a khung tawh a, United tana a khung tam ber ṭum 2015-16-a a goal khung zat goal 17 pha turin goal thum chiah a mamawh tawh.

United hian hun hnehna chan ngei tumin player thar Odion Ighalo leh Bruno Fernandes te an luhtir a, Portuguese midfielder an luh hnuah khel ṭha sawt mah se goal an khung thei chuang lo. Solskjaer chuan, "Inkhelh a harsa a, khualmualah kan inhnehtawk avangin kan dinhmun a ṭhaah ka ngai," tiin a sawi a, Watford nen an inkhelh dawn avanga player ṭha ṭhenkhat an awltir thu a sawi lang bawk.