Asian Cup 2019 A thiam 16 zingah Australia an tel

Asian champion lai Aus­tralia-in an match hmasa berah Jordan ngam loin mual­pho mah se an match hnuhnung pahnihah insiamṭhain hnehna an chang ve ve a, last 16 an lut. 

Australia hian Jordan an ngam loh hnuah 3-0 in Palestine an sawp a, Thawh­lehni zan khan Syria chu 3-2 a hneh lehin Asia khaw­mualpuia football thiam ram 16 zingah an hming an nemkai. 

Asian champion tana Awer Mabil goal hmahruai khung chu Syria hian Omar Khrbin hmangin an sut a, minute 54-naa Chris Ikonomidis-a hmahruaina goal khung nawn pawh minute 80-naah Omar Al Soma hmangin an chhanglet leh.

Last 16 luh beisei Syria hian Australia hi an chelh tlang mai dawn niin lang mah se Celtic attacking midfielder Tom Rogic chuan hun pek belh minute thumnaah Australia tan a khung leh a, Syria tan sutna hun awm tawh loin Australia chu 3-2 in an chak.

Group B inkhel dangah Pa­les­tine chuan goal khung loin Jordan an inhnehtawkpui a, Syria an lo inhnehtawkpui tawh avanga point hnih neiin last 16 an luh dawn leh dawn loh a la chiang lo.

Asian Cup-ah group pa­ruk aṭangin group tina a sang pahnih chu last 16 lut chiang an ni a, pathumna zinga a ti ṭha paliin anni hi an zawm ve leh bawk ang. 

Palestine hi pathumna an nichiang a, nizan leh zanin inkhel tur result a zirin pathuma zinga a ti ṭha pali-ah hian an tel dawn leh dawn loh a chiang dawn a ni. 

Zaninah inkhel pali a awm dawn a, dar 7:00-a Japan leh Uzbekistan inkhel tur hian ngaihven a hlawh zual ang - team pahnih hi Group F-ah vawi hnih ve ve an chak tawh a, hmahruaitu nichunga last 16 luh chu an inchuh tur a ni. 

Group F inkhel dangah chak la nei lo pahnih Oman leh Turkmenistan chu dar 7:00 veka inhmachhawn tur an ni a, a chak zawk tan last 16 a beisei ngam ang. 

Zan dar 9:30-ah Saudi Arabia leh Qatar an inkhel dawn a, anni pawh vawi hnih ve ve chakin last 16 an lut chiang tawh - dar 9:30-ah vek last 16 luh beiseiin chak la nei lo Lebanon leh North Korea an inkhel dawn bawk.