Fulham player thar Babel

Premier League mawngphah lama talbuai mek Fulham chuan inthuam chak an tum a, Turkish club Besiktas aṭangin Liverpool winger hlui Ryan Babel an lalut.

Kum 32 mi Babel hian Anfield-ah kum thum leh a chanve hun a lo hmang tawh a, hei vang hian English football-ah a mikhual dawn lo - Fulham tan hian tun season tawp thleng atan inremna an siam.

Dutch international Babel chuan, "Fulham hian hma an sawn theih ngei ka ring, ka rin ngam vanga he hmun hi pan ka ni," tiin a sawi. Fulham vice chairman Tony Khan pawhin an manager Claudio Ranieri nen Babel chungah rinna an nghah ngam thu a sawi ve bawk.

Fulham hi league table-ah a hniam ber dawt an ni mek a, a him china awm Cardiff City an phak lohna chu point nga a ni mek; Pathianni zan hian Tottenham nen an inhmachhawn ang.