Roger Federer a la tlo reng

Australian Open champion lai Roger Federer chuan nimin khan Dan Evans lakah fiahna hautak a paltlang. Federer hian British tlangval hi 7-6 (5), 7-6 (3), 6-3 a hnehin Melbourne Park-ah hian a zawna a vawi 20 nan third round a lut.

Grand Slam vawi 20 champion tawh Federer lakah world number 189 Evans-a'n set hmasa pahnih a khel thei hle. Mahse, atan Rod Laver Arena chu mikhualna ram a nih laiin Federer tan erawh tun hma lama a inlan fo tawhna a nih avangin set thumna an khelh meuh chuan pleyer ṭha zawk a nihna a lang chhuak.

Kum 37 mi Federer hian a match leh-pekah chuan Taylor Fritz a hmachhawn ang. American player hian Gael Monfils a hneh theih avangin Federer tan awlsam taka paltlang ngawt tum chi a ni lo mai thei.

Australian Open vawi ruk champion tawh Federer-a'n a kum a tam tawh tih hre rengin, tha khek a ngaih vangin set thum chhunga hnehna chan zel a pawimawh thu a sawi tawh a, nikumah pawh a ti hlawhtling thei.

Federer chuan, "Set thum chhungin hnehna ka chang thei dawn lo niin ka hre hman hial. Evans khan a khel ṭha em em a, match tir lamah khan thli a thawt nasat bakah a ball vuak a na hle, ka khelh ṭhat ṭum a lo ni ve hlauh kha ka vanneih phah a ni," a ti.

Grand Slam chungchang sawi zuiin Federer chuan, "Hard court a nih tawh chuan Novak Djokovic hi rinkai a ni, clay-ah chuan Rafael Nadal chu roreltu niin, kei pawhin Wimbledon khelh nuam ka ti thung," a ti a, tun Australian Open bikah chuan champion tur chiang an awm bik loh thu a sawi.

Australian Open seeded pangana Kevin Anderson chu Frances Tiafoe lakah 4-6, 6-4, 6-4, 7-5 a chak loin second round-ah a zinkawng a tawp. South African tlangval chak lo hi nimin chawhma lama beisei loh result kan hmuh langsar ber a ni.

Season hmasa Wimbledon finalist Anderson-a'n set hmasa ber a lak avangin harsa lutuk loa chak thei tura ngaih a ni. Mahse, tawnhriat nei tlem zawk Tiafoe-a'n huaisen takin set hnuhnung pathum a la.

World number 39 Tiafoe hian Melbourne Park-ah a vawi khat nan third round a inhlangkai ve a, Grand Slam a khelh tawh chinah chuan second round a paltlang vawi hnihna a ni thung - match lehpekah Andreas Seppi nen an inkhel ang.

US Open champion hlui Marin Cilic chuan inkhel inhnehtawk takah Mackenzie McDonald chu 7-5, 6-7 (9-11), 6-4, 6-4 in a hneh. Seeded parukna Cilic hi a tir lamah buai deuh mah se set hnuhnung pahnihah erawh a dingnghet hle.

Inkhel dangah Stefanos Tsitsipas chuan Viktor Troicki 6-3, 2-6, 6-2, 7-5 in a hneh ve bawk a, a match lehpekah chuan Georgian player Nikoloz Basilashvili nen an inkhel leh dawn a ni.

Nimin mipa singles inkhel dangah Diego Schwartzman, Nikoloz Basilashvili, Tomas Berdych leh Stefanos Tsitsipas te pawhin hnehna an chang ve bawk. Australian Open hi January 27-ah zawh a ni ang.