Mangṭha, Constantine - India coach leh a sulhnu

India coach Stephen Constantine-a'n Asian Cup aṭanga India a tlakpui hnuah a hna aṭanga a chawlh thu a puang a, UAE-a thuthar thehdarhtute a kawmnaah a duh ang pawh sawi zo thei loin hnuk ulh chungin press conference a chhuahsan. 

Stephen Constantine hian 2002-2005 inkar khan India a lo enkawl tawh. Kum 2014-a India coach Wim Koevermans a ban khan World Cup-a New Zealand hruai thlengtu Ricki Herbert nen buk an ni a, Constantine hi a vawi hnih nan India coach ni tura lakluh a ni. 

Constantine hian India a enkawl tirh hian FIFA ranking-ah Blue Tigers hi 173-na an ni a, mahse January 2019-a a chhuahsan meuh chuan 97-na an ni a, 2011 hnua a vawi khat nan Asian Cup a khelhpui bawk.  

Kum 56 mi coach hian India a bansan tur thu a sawi hian, "Ka hna ka hlen a ni," tiin a sawi a, a hnathawh thlirin tuman an hnial thei lo ang. 

January 16, 2015 khan Constantine-a'n a vawi hnih nan India a enkawl dawn tih a chiang a, Blue Tigers-a a kir hnua a match hmasa ber March 12-a Nepal nen World Cup qualifier an khelh hmain Vanglaini chuan Constantine hi kawmna kan nei. 

Hemi ṭum hian Constantine chuan Vanglaini hnenah State league thlenga an ngaih pawimawh tur thu leh academy thlenga an zirchian tur thu a sawi a, national league-ah chauh 'talent' a awm loh thu leh footballer ṭha apiang chance pek a duh thu a hrilh. 

Constantine-a'n a sawi ang ngeiin India a enkawl ṭantirh lamah player a dap khawm nasa a, India-a kum li a cham chhungin player 40 zet chuan a hnuaiah a vawi khat nan ram tan jersey an ha. 

Constantine-a'n India a enkawl hmasak kum 2002-2005 khan Mizo pahnih Jerry Zirsanga leh Malsawma te chu ram tan an match hmasa ber a khelhtir a, Jerry phei hi chu tun thlengin India senior team tana goal khung thei naupang ber a la ni reng. 

November 2004 khan Jerry hian Kuwait lakah India tana a goal hmasa ber a khung a, hetihlai hian kum 16 leh ni 311-a upa niin India tana goal khung thei naupang ber dinhmun a luah. 

Kum 2015 khan Mizo rawlthar Lallianzuala Chhangte chu top flight football a khelh hma hauhin SAFF Championship khel turin Constantine hian a ko a, hetihlaia DSK Shivajians Academy player hian Nepal lakah goal hnih khungin India tana goal khung thei naupang pathumna a ni. 

English coach hian India a enkawl hmasaka Jerry Zirsanga leh Malsawma hnuah Mizoram player pasarih chu India tana an match hmasa ber a khelhtir.

Lalchhuanmawia Fanai, Daniel Lalhlimpuia Jerry Lalrinzuala, Lalruatthara, R. Laldanmawia Lallianzuala Chhangte leh Isaac Vanmalsawma te chuan Constantine-a hnuaiah India tana an match hmasa ber an khel a; David Lalrinmuana leh Malsawmzuala chu squad-ah a ko chungin ram tan an inlan hman lo. 

Mizoram player zingah S. Malsawm-tluanga, Robert Lalthlamuana, Lalrindika Ralte leh Jeje Lalpekhlua te chu ram tana inlan tawh vek ni mah se Constantine-a hmain India tan an khel tawh a, an zingah hian Jeje chiah chu Constantine-a'n ram tana khel tura a koh nawn a ni bawk. 

Asian Cup 2019-a Indian player 23 zingah khan Jeje leh Sunil Chhetri chiah chu Constantine hnuaia ram tana an match hmasa ber khel lo an ni a,  Mizo zingah Jeje chu Constantine-a hnuaia khel hnem ber a ni. 

Constantine enkawlna hnuaiah Jeje-a'n match 35 a khel a, goal 15 a khung. SAFF Cup 2015-ah Constantine enkawlna hnuaia champion player zingah a tel a, English coach player rin ber zinga mi a ni. 

Jeje hian ram tan match 56 khel tawhin goal 23 a khung - Constantine-a'n India a enkawl hmain ram tan match 21 a khel hman tihna a ni a, goal riat a khung hman bawk. 

Constantine-a'n India a enkawl chhunga sawisel a hlawhna ber chu player tam tak ram tana an match hmasa ber a khelhtir chungin a ko chhunzawm mang lo a, a squad neihsa siksawi vak loa a player rin ngai rin a ching. 

English coach-in India hi match 43 a enkawl hman a, vawi 24 hnehna changin vawi 13 an tlawm a, vawi ruk an khingpui an inhnehtawkpui. 

Constantine hnuaiah India-in goal 75 an khung a, an lamah goal 44 lutin vawi 18 goal chhuah loh an nei a, an chak percentage hi 55.8% a tling pha a ni.