Number 1 Halep a tlang hram

Simona Halep chuan Kaia Kanepi hnehin Australian Open second round a lut hram a, world number 1 zingah a zawna Grand Slam pahniha first round paltlang zo lo hmasa ber a ni hman teuh hle, tlang turin vanneihna a mamawh tel.

Thawhlehni zan Melbourne Park-a inkhelah Halep hi 6-7 (2-7), 6-4, 6-2 in a chak hram. World number 1 Kanepi lakah hian nikum khan US Open first round-ah a lo tlawm tawh a ni. Romanian nula hian match lehpekah chuan American player Sofia Kenin a hmachhawn leh ang.

Kum 27 mi Halep chuan, "US Open-a kan ngam loh a nih avang khan ka chungah pressure a awm phah, he hmunah hian hlau leh khur chunga rawn kal ka ni lo a, ka hma a awm chona hmachhawn turin ka inpeih a ni," a ti. Season hmasa khan Halep hian Australian Open final a lut a, mahse  a chak lo zawkah a ṭang.

Inkhel dangah champion lai Caroline Wozniacki chuan nimin khan a match hnihna khelin Johanna Larsson chu 6-1, 6-3 a hnehin third round a in vaw kai der tawh. Wozniacki hian a match lehpekah chuan 2008 champion Maria Sharapova leh Rebecca Peterson te inkhela chak zawk a hmachhawn leh dawn a ni.

US Open champion Naomi Osaka chuan Magda Linette lakah inringtawk taka khel chhuakin 6-4, 6-2 in hnehna a chang. Seeded parukna Elina Svitolina pawhin Viktorija Golubic chu 6-1, 6-2 in a hneh ve bawk.

Ranking sang zual 10 zingah Daria Kasatkina chu tla hmasa ber a ni. Kasatkina hi minute 55 chhungin Timea Bacsinszky lakah 6-3, 6-0 in a tlawm. Russian nula hi seeded 10-na niin a khingpui erawh world number 192 daih a ni.

Mahse, chak tura rinkai zawk Kasatkina a khel ṭha lo, double faults vawi 10 zet a nei a, he tih lai hian Bacsinszky lakah winners vawi ruk bak a vaw chhuak thei lo.